На суботніку і не толькі
Адным з аб’ектаў, дзе глушчане ў мінулую суботу наводзілі парадак, была зона адпачынку ў Глуску “Лодачная станцыя”, там работнікі “Жылкамгаса” рамантавалі і фарбавалі лаўкі, альтанкі, раздзявалкі і іншыя патрэбныя для адпачываючых дробныя збудаванні, прыбіралі прыбярэжную паласу. Акрамя таго, камунальнікі фарбавалі прыпынкі ў Глуску, сеялі газон паміж дарогай і тратуарам па Савецкай вуліцы, высякалі кусты і выконвалі іншыя работы. Шмат што зроблена на дзіцячых пляцоўках, свой уклад у іх добраўпарадкаванне ўносілі работнікі Аўтапарка № 15, ДРБУ-213, райпо, лясгаса, раёна электрасетак, іншых прадпрыемстваў і, зноў жа, камунальнікі: рамантавалі, фарбавалі, прыбіралі. У выніку папрыгажэла больш за дзясятак пляцовак для гульні і адпачынку ў дварах па Пушкінскай, Жыжкевіча, Савецкай, Кірава, Гагарына.
Многія арганізацыі прадоўжылі навядзенне парадку на сваіх вытворчых і прылягаючых да іх тэрыторыях: Аўтапарк, “Беларусбанк”, лясгас, пошта, а таксама работнікі культуры, адукацыі. На тэрыторыі СШ № 2 і аддзела адукацыі пасаджаны алеі туй, акрамя таго, на рахунку аддзела па адукацыі, спорце і турызме — узорны парадак у яблыневым садзе каля Калаціч. А яшчэ ўстановы адукацыі (настаўнікі, школьнікі) працавалі на тэрыторыях замацаваных за імі помнікаў.
Стала ўжо традыцыйнай работа брыгады з ліку членаў грамадскіх аб’яднанняў. Вось і ў мінулую суботу, па словах старшыні раённага аб’яднання прафсаюзаў Аляксандра Леўчанкі, яны не засталіся ў баку ад агульнай справы. Прафсаюзныя актывісты, прадстаўнікі раённага камітэта БРСМ, ветэранскай арганізацыі, Кампартыі Беларусі ў рамках акцыі “Беларусь памятае” наводзілі парадак на помніках і воінскіх пахаваннях у вёсцы Мыслоціна, на Мыслачанскай гары, у Хваставічах і Даколі — прыбіралі тэрыторыі, фарбавалі.
Т. ЛУКАШЭВІЧ