У апошні час Глуск стаў нагадваць адну вялікую будпляцоўку: дзясяткі будаўнікоў актыўна рэканструююць, рамантуюць, абнаўляюць вуліцы і будынкі. Назіраць за гэтымі пераўтварэннямі, безумоўна, прыемна і цікава, нягледзячы на тое, што яны прыносяць жыхарам часовыя нязручнасці, бо даводзіцца іншы раз аб’язджаць ці абыходзіць перакрытыя вуліцы, чуць шум і гул будаўнічай тэхнікі. Важна, што перамены ёсць, і з кожным днём яны робяць Глуск больш прывабным, дагледжаным і зручным для жыцця.

Раённая газета не перастае ўважліва сачыць за ходам гэтых работ. З апошняга, што трапіла ў наш фотааб’ектыў, — рамонт дарог у Глуску. Многія з іх даўно выклікалі незадаволенасць жыхароў райцэнтра, чакалі значных перамен. І вось урэшце дачакаліся. Рамонтныя работы актыўна распачаліся не толькі на цэнтральных вуліцах — новыя абрысы сталі паступова набываць і невялікія вулачкі. Так, роўненькі асфальт дарожнікі зусім нядаўна паклалі па вуліцы Камсамольскай, у новае дарожнае пакрыццё пераапрануўся і ўчастак дарогі па вуліцы Карла Маркса (да перакрыжавання з вуліцай Сацыялістычнай). Спраўна папрацавала дарожна-будаўнічая тэхніка і на вуліцы Першамайскай (ад перакрыжавання з вуліцай Карла Маркса да перакрыжавання з вуліцай Кірава). Значныя будаўнічыя работы падчас нашага аб’езду вяліся таксама па вуліцы Сямёнава. Каля будынка бальніцы дарожныя рабочыя пракладвалі новы тратуар, крыху пазней яны заменяць тут асфальт. Рамонт дарожнага пакрыцця на названых участках дарог (дарэчы, яны знаходзяцца на балансе мясцовых камунальнікаў) праводзілі бабруйскія дарожнікі. Усяго запланаваны бягучы рамонт 12 вуліц.

Зараз працягваецца капрамонт участка дарогі па вуліцы Максіма Горкага: работнікі ДРБУ № 213 завяршаюць укладку тратуара з пліткі, у хуткім часе заасфальтуюць праезную частку. Сіламі мясцовых дарожнікаў праводзіцца таксама бягучы рамонт участка Глуск — Бярозаўка — станцыя Ратміравічы, з запланаваных дзевяці кіламетраў ужо адрамантавана тры. Не спыняюцца работы дарожнай службы раёна і па навядзенні парадку на ўзбочынах дарог.

Г. АЎТУХОВА

Фота аўтара