OLYMPUS DIGITAL CAMERA
“…А ўсё ж лячу к свайму гнязду, к свайму адзінаму пачатку…” — пранікнёныя радкі Сяргея Грахоўскага сталі сімвалам любові глушчан да сваёй роднай старонкі. Гэтыя ж радкі паклаў у аснову скульптурнай кампазіцыі “Роднае гняздо” магілёўскі майстра Андрэй Вераб’ёў (на здымку), старшыня абласной арганізацыі Беларускага саюза мастакоў. Адкрыццё кампазіцыі, якая атрымала сталую прапіску на бульвары Грахоўскага, насупраць барэльефа паэта, адбылося падчас “Дажынак-2019”. Удзел у цырымоніі прынялі Леанід Заяц, Сцяпан Чачуха, сям’я глушчан Жынько — прызёраў абласнога этапу конкурсу “Сям’я года — 2019”, а таксама аўтар кампазіцыі. Андрэй Вераб’ёў даў кароткае інтэрв’ю нашай газеце: “У падмурку ўвасоблены вобраз зямлі: з аднаго боку — вёска на беразе Пцічы, хаткі, дрэвы, а з другога боку, калі абысці кампазіцыю, — прадметы, якія характарызуюць дабрабыт, якія мы заўсёды бачым на стале, і на святочным стале ў першую чаргу. Гэта хлеб, сала з цыбуляй, яешня скварчыць са шкваркамі, бутэлечка, агурок, гарлач з малаком. Сімвалічная калона, аплеценая травамі і кветкамі, вянчаецца колам. Кола — гэта сімвал шчасця, дабрабыту, сімвал сонца, і на гэтым коле — буслянка: тата, маці і трое дзетак. І нядаўна я даведаўся, што ў буслоў бывае розная колькасць буслянят, аказваецца, калі іх шмат (а трое лічыцца шмат) — значыць, год будзе дабрабытным, яны змогуць іх выгадаваць. Таму вось такое пажаданне жыхарам раёна: шчасця і дабрабыту…”
