Каманда дэпутатаў Глускага раёна: Жанна Нагорная, Вікторыя Самусева, Ігар Сушчэня, Вячаслаў Асташэвіч, Мікалай Куратаў, Галіна Юхневіч, Аляксандр Ляпко, Наталля Акуліч
Два дні, 25 і 26 студзеня, доўжылася зімовая спартакіяда дэпутацкага корпуса Магілёўскай вобласці. Месцам яе правядзеня стаў горад Шклоў. Сярод 23 каманд-удзельніц былі і прадстаўнікі Глускага раёна — восем дэпутатаў раённага і сельскага ўзроўняў пад кіраўніцтвам старшыні раённага Савета Вячаслава Асташэвіча. У праграме спартакіяды былі заяўлены спаборніцтвы па дартсе, стральбе, плаванні, шорт-трэку (бег на каньках) і “Трапны хакеіст” (кіданне шайбы па варотах). За кошт таго, што адзін спартсмен мог удзельнічаць толькі ў адным відзе (за выключэннем кідкоў па варотах), павялічылася масавасць спаборніцтваў, узрасла канкурэнцыя, а значыць, і цана прызавых месцаў. Па словах Вячаслава Асташэвіча, спартакіяда была добра арганізавана, цырымоніі адкрыцця і закрыцця праходзілі ў лядовай арэне, усё гэта ператварыла традыцыйнае мерапрыемства ў сапраўднае спартыўнае свята. Між іншым, у нашай каманды былі і свае нагоды для добрага настрою — першае месца па бегу на каньках, якое заняла Галіна Юхневіч, і другое месца па плаванні — у Ігара Сушчэні. Дыпломы, віншаванні і добрыя прызы (рукзак і спальны мяшок) сталі для іх заслужанай узнагародай.
Т. ЛУГАВАЯ
Фота прадастаўлена раённым Саветам дэпутатаў
