Трэцякласніца Глускай СШ № 1 Бажэна Лосік — пераможца сярод самых юных удзельнікаў раённага конкурсу “Жывая класіка”
На Глушчыне прайшоў раённы этап рэспубліканскага творчага конкурсу юных чытальнікаў “Жывая класіка”. Удзел у ім прынялі 28 навучэнцаў з усіх устаноў адукацыі раёна. Канкурсанты спаборнічалі ў чатырох узроставых групах. Як паведаміла метадыст аддзела па адукацыі, спорце і турызме Глускага райвыканкама Наталля Някрасава, у гэтым годзе конкурс праходзіў у новым фармаце — завочна. Так, разам з настаўнікамі вучні падбіралі і развучвалі вершы альбо празаічныя ўрыўкі, прадумвалі сцэнічныя вобразы, дэкарацыі, падбіралі музычнае суправаджэнне, а пасля здымалі свае выступленні на відэа і дасылалі іх у аддзел па адукацыі. Юных чытачоў па артыстызме, выбары тэксту твора, глыбіні пагружэння ў вобраз ацэньвалі спецыялісты аддзела па адукацыі, а таксама настаўнікі беларускай мовы і літаратуры. Наталля Някрасава адзначыла, што з вуснаў дзяцей пранікнёна, душэўна, мілагучна і шчыра гучалі творы Янкі Купалы, Якуба Коласа, Максіма Танка, Алеся Гаруна, Анатоля Вярцінскага, Івана Шамякіна, Святланы Алексіевіч і іншых аўтараў. Вучні звярталіся да тэм малой радзімы, роднай мовы, вайны.
Па выніках конкурсу сярод вучняў-пачаткоўцаў пераможцай стала вучаніца 3-га класа Бажэна Лосік (сярэдняя школа № 1), другое месца прысуджана трэцякласніцы гэтай жа школы — Ноне Ясючэні, дыпломам III ступені адзначана вучаніца 4-га класа сярэдняй школы № 2 Ангеліна Масюк. Сярод юных чытальнікаў пятых — шостых класаў лепшым стаў гімназіст Алег Сеўрук (6-ы клас), на другім месцы — Ірына Дзянісава, шасцікласніца санаторнай школы-інтэрната, на трэцім — Сцяпан Касцюкевіч з Каткаўскай школы (6-ы клас). Сярод вучняў сёмых — восьмых класаў першае месца заняла вучаніца 8-га класа сярэдняй школы № 2 Руслана Дуброўская, другое — сямікласніца Заеліцкай школы Уладзіслава Смушкова, трэцяе — вучаніца 8-га класа гімназіі Вікторыя Бізункова. У старэйшай узроставай групе першае месца раздзялілі паміж сабой два вучні — дзевяцікласнікі Заеліцкай школы Ганна Смушкова і Кірыл Лапуцька.
Відэавыступленні пяці ўладальнікаў першых месцаў ужо накіравалі арганізатарам абласнога этапа конкурсу “Жывая класіка”, яго вынікі падвядуць у маі. Што ж, давайце пажадаем юным чытальнікам Глушчыны ўдачы. Заключны (рэспубліканскі) этап пройдзе падчас святкавання Дня беларускага пісьменства ў Бялынічах. Яго пераможцы будуць узнагароджаны пуцёўкамі ў Нацыянальны дзіцячы адукацыйна-аздараўленчы лагер “Зубраня”.
Ганна АЎТУХОВА
Фота аўтара
