У маі 1996 года ў Беларусі было афіцыйна ўстаноўлена свята Дзень друку, якое адзначаецца ў нашай краіне штогод 5 мая. У савецкай дзяржаве таксама 5 мая адзначалі Дзень друку, але савецкага. У СССР гэта дата была звязана з днём выхаду ў свет першага нумара газеты “Праўда”. Канешне ж, прафесійнае свята журналістаў і паліграфістаў адзначалі заўсёды на высокім узроўні — праводзіліся партыйныя сходы ды іншыя мерапрыемствы.
На здымку, які перад вамі, паважаныя чытачы, — запрашальны білет менавіта на адзін такі ўрачысты сход партыйна-камсамольскага і савецкага актыву, прысвечаны Дню бальшавіцкага друку, які павінен быў адбыцца ў глускім Доме сацкультуры. Так у маі 1940 года раённы камітэт партыі і рэдакцыя райгазеты “Соцыялістычная вёска” запрашалі на ўрачыстасць глускага доктара Аляксандра Сямёнава. Магчыма, каб надаць мерапрыемству яшчэ большую значнасць і сур’ёзнасць, на запрашэнні размясцілі партрэты Сталіна і Леніна. Ёсць меркаванне, што такія запрашэнні патрэбна было захоўваць амаль усё жыццё. А калі падумаць, то і праўда, як можна было чалавеку ў той час білет з Леніным ды Сталіным выкінуць на сметнік? Захоўвалася такое запрашэнне вельмі доўга ў сям’і доктара Сямёнава: спачатку ў самога Аляксандра Сцяпанавіча, потым у яго сына Юрыя, а зараз у іх родзічаў.
Вольга ЯНУШЭЎСКАЯ
Фота з архіва сям’і Сямёнавых
