Дырэктар ААТ “Глускае райаграпрамтэхзабеспячэнне” Валянцін Шостак і механізатар Сяргей Зімаеў
Месца, дзе механізатар адкрытага акцыянернага таварыства “Глускае райаграпрамтэхзабеспячэнне” Сяргей Зімаеў касіў шматгадовыя травы на сена, мы знайшлі адразу. Гэта вядомае многім урочышча Глыбокая Даліна, што побач з Глускам: дамы местачкоўцаў літаральна праз дарогу. Можна сабе ўявіць, як прыемна там у гэты час пахне свежаскошанай травой, яе ж не вузенькая палоска, а адразу шырокія пракосы. Да корманарыхтоўкі Сяргей Іванавіч араў зямлю, цяпер перасеў на трактар з касілкай КПР-9, шырыня захвата 8,7 метра, скошаная маса адразу ўкладваецца ў валкі. Тэхніка новая, працуе добра, механізатар вопытны і адказны, таксама працуе добра, ведае і сваю справу, і тэхнічныя магчымасці касілкі, таму папярэдзіў нас, каб другі раз блізка не падыходзілі, пакуль нажы ў касілцы круцяцца, з-пад іх і каменьчык выскачыць можа. Што да траў, то яны сяголета не вельмі добрыя, было мала вільгаці, але касіць трэба, трэба сена рыхтаваць.
Як патлумачыў нам, прыехаўшы на сенажаць, дырэктар РАПТЗ Валянцін Шостак, свежае залужэнне пашкодзілі веснавыя замаразкі, таму травастой слабы, але ёсць спадзяванне, што цяперашняе пацяпленне і далейшае надвор’е паспрыяюць хуткаму росту травы і першы ўкос у гаспадарцы сяголета будзе не горшы, чым летась. Масавае сенакашэнне тут пачалося ў пачатку чэрвеня, але выбарачна спрабавалі касіць і раней. Разам з касьбой траў на сваіх сенажацях тэхніка РАПТЗ, у складзе сумеснага механізаванага атрада, задзейнічана на зялёным жніве ў “Турыно-агра”, там нарыхтоўкай сенажу на кормаўборачным камбайне зараз (размова адбылася 11 чэрвеня) займаецца Сяргей Шчэрба, адвозяць зялёную масу вадзіцелі Андрэй Шымчык і Уладзімір Клыга. У бліжэйшы час, па словах Валянціна Шостака, у сельгасарганізацыі самі стануць закладваць сянажныя траншэі з канюшыны, злакавых траў і люцэрны. Да таго ж пачатак кармавым адзінкам тут ужо пакладзены: у райаграпрамтэх-забеспячэнні яшчэ да выхадных было нарыхтавана 710 тон сіласу з палосных пасеваў. А патрэбна для грамадскага статка за сезон нарыхтаваць 600 тон сена, 8500 тон сенажу і 9000 тон сіласу, усяго 5460 тон кармавых адзінак, больш за 30 цэнтнераў кармавых адзінак на ўмоўную галаву буйной рагатай жывёлы. Каб паскорыць і аптымізаваць працэс корманарыхтоўкі, у РАПТЗ і “Турыно-агра” і быў створаны механізаваны атрад, у яго ўваходзяць два корманарыхтоўчыя комплексы, шыроказахватная касілка, граблі, ад шасці да васьмі аўтамабіляў на адвозцы зялёнай масы і на яе трамбоўцы яшчэ адна адзінка тэхнікі. На мінулым тыдні атрад працаваў у “Турыно-агра”, з 13 чэрвеня скіраваў свае намаганні на патрэбы райаграпрамтэхзабеспячэння.
Таццяна ЛУКАШЭВІЧ
Фота Ганны АЎТУХОВАЙ
