Старшыня раённага савета піянерскай арганізацыі Святлана Каржнёва
Раённы савет Беларускай рэспубліканскай піянерскай арганізацыі ва ўмовах неспрыяльнай эпідэміялагічнай сітуацыі не спыняў сваю работу, рэалізуючы новыя ідэі, цікавыя праекты, праўда, цяпер у асноўным у інтэрнэт-прасторы.
“Ужо падчас вясенніх канікул школьнікі сталі ўдзельнікамі анлайн-праектаў “Клёвыя канікулы” і “Час па-піянерску”, — расказала старшыня раённага савета ГА “БРПА” Святлана Каржнёва. — У нашай групе ў сацсетках “УКантакце”, “Інстаграм” і “Фэйсбук” дзеці атрымлівалі анлайн-заданні, напрыклад, зрабіць экспрэс-зарадку, прыгатаваць дэсерт для родных, прыдумаць дэвіз дня, пасля чаго фота- або відэасправаздачу размяшчалі ў групе. Такім чынам, застаючыся дома, хлопчыкі і дзяўчаткі праводзілі канікулы цікава і карысна. Найбольш актыўнымі ўдзельнікамі анлайн-праектаў сталі піянеры з сярэдняй школы № 2, гімназіі, Завалочыцкага, Заеліцкага і Усцярхоўскага навучальна-педагагічных комплексаў. Таксама напярэдадні 75-годдзя Перамогі ў Вялікай Айчыннай вайне піянеры добраўпарадкоўвалі воінскія пахаванні, ускладвалі да іх кветкі, ушаноўвалі памяць загінуўшых хвілінамі маўчання. Акрамя таго, мы прапанавалі ім паўдзельнічаць у пазнавальным анлайн-квесце “Па слядах Перамогі”, дзе вучні збіралі анлайн-пазл, праходзілі віктарыны, знаёміліся з жыццём піянераў-герояў. Таксама да Дня піянерскага сяброўства быў запушчаны інтэрнэт-чэлендж. Яго ўдзельнікі здымалі відэа з віншаваннямі, стваралі фотакалажы. Цікавымі і арыгінальнымі атрымаліся пажаданні ад піянерскіх дружын з Заеліцкага і Усцярхоўскага НПК. У фае Цэнтра творчасці была арганізавана выстава з піянерскай атрыбутыкай. Дарэчы, тут можна было ўбачыць і пагартаць летапіс раённай піянерскай арганізацыі, створаны мной па ўласным праекце”.
Год назад у беларускіх піянераў з’явіўся талісман — мяккая цацка рысяня Вогнік, і ў Міжнародны дзень аховы дзяцей пачаўся яшчэ адзін займальны анлайн-праект — “Летняе падарожжа Вогніка”. Да 30 чэрвеня ў сацсетках раённай піянерскай арганізацыі неабходна размясціць фота з талісманам на фоне славутасцей нашага раёна. Па выніках праекта будзе створана віртуальная карта, куды нанясуць месцы, дзе пабываў Вогнік, са спасылкамі на тую ці іншую славутасць. Гэты анлайн-праект, адзначыла Святлана Каржнёва, дазволіць пазнаёміць дзяцей і дарослых з найбольш цікавымі мясцінамі раёна. Самых актыўных удзельнікаў узнагародзяць дыпломамі і салодкімі прызамі.
Г. АЎТУХОВА
Фота аўтара
