Толькі пад Новы год у адным месцы і ў адзін час маглі сабрацца такія розныя казачныя героі, як Аладзін з Шамаханскай царыцай, сціплая Папялушка, казачная Фея, Кот у ботах, тры Парасяці, стыльныя артысты Карабасава тэатра, дзіўныя і загадкавыя госці з Месапатаміі, чародка вясёлых і лёгкіх Сняжынак, прыйшоў, зразумела, і зімовы Дзед у чырвоным футры са сваёй снежнай унучкай Снягурачкай. Такое дзіва-дзіўнае, такая незвычайная гастроль гэтых казачных артыстаў адбылася якраз пад Новы год, і не дзе-небудзь, а ў цераме высокім ды прыгожым. З ролямі казачных герояў-артыстаў цудоўна справіліся вучні Глускай санаторнай школы-інтэрната, а церамам высокім ды прыгожым часова стала сама школа-інтэрнат — прыбраная да навагодняга свята, яна і насамрэч выглядае незвычайна і нават загадкава як звонку, так і знутры. Да навагодняга свята тут падрыхтавалі цікавую канцэртную праграму — з самымі што ні на ёсць чароўнымі навагоднімі песнямі, рытмічнымі танцамі, жартоўнымі вершамі, якія, нібы пацеркі, нанізаў на адзін агульны сюжэт дамавічок Феафан. Праўда, сам ён да гасцей не выходзіў, бо часова знаходзіцца на самаізаляцыі. Ну ды і без яго ўсё было добра — дзеці не толькі самавесяліліся і самазабаўляліся, але і весялілі паважаных гасцей. У чарговы раз пераканалася: калі каму патрэбна адшукаць таленты, звяртайцеся ў санаторную школу, тут гэта ўмеюць рабіць, тут такія пошукі заўсёды маюць плён. Ну а калі хочаце добрых падарункаў — трэба звяртацца ў Міністэрства лясной гаспадаркі: тут для дзяцей заўсёды знойдзецца ўсё смачнае і карыснае.
Вельмі хваліў навагодні канцэрт у санаторнай школе Глуска міністр лясной гаспадаркі Рэспублікі Беларусь Віталь Дрожжа, сваю падшэфную ўстанову ён наведаў у рамках акцыі “Нашы дзеці”, ад душы падзякаваў артыстам за цудоўную праграму, пажадаў усім выхаванцам школы марыць пра ўсё добрае і верыць, што яно абавязкова спраўдзіцца, для гэтага толькі патрэбна прыкласці крыху сіл і старанняў. У якасці падарунка ад міністэрства школьная кухня папоўнілася параканвектаматам — карысная, кажуць, рэч у прыгатаванні страў. Шматфункцыянальны тэлевізар перадаў школе ад Магілёўскага дзяржаўнага вытворчага лесагаспадарчага аб’яднання яго генеральны дырэктар Уладзімір Раеўскі. Ён таксама пахваліў артыстаў і іх педагогаў за майстэрства і фантазію, падзякаваў за добры настрой і пажадаў, каб новы год прынёс усім здароўе, мір і спакой у дамы і ўсё самае лепшае. Падзякаваў за прыгожае выступленне і выказаў шчырыя пажаданні на ўвесь новы год дзецям і дарослым дырэктар Глускага лясгаса Сяргей Максімовіч, а добры настрой перад святамі шэфы падмацавалі дзецям салодкімі падарункамі. Ад імя раённага Савета дэпутатаў і раённага выканаўчага камітэта падзякаваў міністэрству і лесаводам вобласці і раёна за ўвагу да дзяцей, да патрэб школы старшыня раённага Савета дэпутатаў Вячаслаў Асташэвіч і перадаў сертыфікат на атрыманне ласункаў. Не застаецца ў баку ад добрых спраў і раённае спажывецкае таварыства, начальнік аддзела кадраў райпо Аксана Мазітава ад імя кааператараў раёна павіншавала дзяцей і педагогаў школы з Новым годам і перадала падарункавы сертыфікат. Новы год насамрэч цудоўнае свята, яно аб’ядноўвае людзей, выклікае ў іх самыя добрыя памкненні і светлыя пачуцці. За дабро і ўвагу, за цёплыя словы і цудоўныя падарункі падзякаваў гасцям дырэктар школы Анатоль Ласоцкі, пажадаў ім шчасця і здароўя, на памяць пра гэты канцэрт, гэты дзень і гэтую цёплую пераднавагоднюю сустрэчу дзеці падарылі сваім шэфам і гасцям сувеніры, зробленыя сваімі рукамі.
Т. ЛУГАВАЯ
Фота Г. АЎТУХОВАЙ
Яшчэ больш фота глядзіце тут
