Спачатку было Міхаіл Пятрэня не хацеў ні фатаграфавацца, ні якоесь там інтэрв’ю для газеты даваць: прыхварэў бычок адзін і яго патрэбна было пераганяць з асноўнага статка ў асобную групу, давялося пабегаць за жывёлінай, каб яна стала на новае месца, а потым цюк саломы на подсціл раскідаць. Якія тут размовы, якая пахвальба?! Ды мы журналісты з вопытам, і адмаўляюць нам не ўпершыню, таму слова за слова, а ўсё ж такі пагаварылі з жывёлаводам.
Яно і праўда, работа даглядчыка на ферме не самая цікавая і не надта разнастайная. Перагнаць жывёлу, падаслаць у стойлах, падкінуць кармы пасля раздатчыка, наліць вады ў паілкі, пачысціць кармавыя сталы — пералічвае Міхаіл свае абавязкі па доглядзе за жывёлай, а калі прыхварэе каторая — перагнаць яе ў асобнае стойла і выклікаць ветэрынара. Расказваючы пра сваю работу, ён то паказвае, дзе што робіць, то бярэцца за вілы ды адгортвае ад цюка пласты саломы — бачна, што не прывык да доўгіх размоў, як рукі яго не прывыклі быць без працы. Даглядае жывёлу Міхаіл Пятрэня з 1989 года, тады тут быў калгас “Праўда”, доўгі час працаваў на свінаферме, было што пераходзіў на іншую работу, але зноў вяртаўся. У тым жа райаграпрамтэхзабеспячэнні, у склад якога ў 2009 годзе ўвайшоў названы калгас, быў і слесарам, і падменным даглядчыкам, цяпер вось працуе на роднай мыслачанскай таварнай ферме (сам ён мясцовы, з Мыслоціна). Тут у трох хлявах і дзвюх кашарах утрымліваюцца 635 галоў буйной рагатай жывёлы — бычкі і каля 30 цёлак. Разам з Міхаілам даглядаюць іх Наталля Галамака і Віктар Тотараў. Каму што рабіць, не дзеляць, прызнаюцца яны, як прыходзяць раніцай, так і пайшла работа: падкінуць, прыбраць, наліць, перагнаць. “Міхаіл тут у нас галоўны чалавек, — хваліць яго Наталля, — ён усё робіць і па сваёй рабоце, і калі што прыбіць, прыкруціць, паправіць трэба — усё можа, без яго было б ніяк”. Як найбольш вопытнага ў жывёлагадоўлі і талковага работніка парэкамендаваў нам Міхаіла Пятрэню і дырэктар ААТ “РАПТЗ” Валянцін Шостак, над гэтым чалавекам не трэба стаяць, кажа ён, не трэба сем разоў паўтараць, зробіць што трэба і як трэба, сярэднясутачныя прывагі жывёлы на гэтай таварнай ферме складаюць 550—600 грамаў.
Сяголета гаспадарка нарыхтавала добрую кармавую базу, жывёле даюць сілас, сянаж, здробненую салому — рапсавую, ячменную, аўсяную, зернесумесь з мукой уласнага памолу, даюць і камбікорм КР-2. Работа на ферме прывычная і добра знаёмая, пацвярджае сам жывёлавод, нічога незвычайнага ў ёй няма, разважае ён, тут усё проста: даглядай жывёлу, кармі яе, вось і ўся справа. Так, справа і сапраўды няхітрая, ды не яна прыцягнула ўвагу да гэтага чалавека, а ён сам, Міхаіл Пятрэня, варты ўвагі за свае адносіны да справы, за сумленне і стараннасць.
Т. ЛУКАШЭВІЧ
Фота Г. АЎТУХОВАЙ
