Год 2020-ы ўжо на схіле, як з ім развітацца і якімі словамі праводзіць, кожны вырашыць сам. А вось 2021 год сустрэць і правесці Новы год як свята патрэбна як мага больш весела, з радасцю ў вачах, з усмешкамі на тварах, з музыкай, гульнямі, спевамі. Менавіта такі настрой хочуць стварыць для нас работнікі культуры, і для гэтага яны склалі даволі цікавую разнастайную святочную праграму.
1 студзеня з 0:45 да 3:00 на бульвары Грахоўскага будзе наладжана гулянне, ды не простае, а з канцэртам “Мелодыі Новага года”; у 1:00 — святочны салют; каму холадна на вуліцы, патанчыць зможа ў “Арыёне”, з 1:00 да 3:00 там будзе дыскатэка.
У гэты ж дзень, 1 студзеня, амаль з паловы дня і да самага вечара, шмат цікавых імпрэз адбудзецца ў Цэнтры культуры і вольнага часу “Арыён”: у 14:00 і ў 15:00 пройдуць дзіцячыя забаўляльна-гульнёвыя праграмы “Студзеньскі маскарад” і “Танцавальны МІКС”; на 16:00, 18:00 і 20:00 запланаваны кінасеансы (у такі ж самы час кіно будуць паказваць таксама 2 і 3 студзеня); у 21:00 — дыскатэка.
2 студзеня ў 12:00 у “Арыёне” пачнецца тэатралізаваны паказ для дзяцей “Чарадзейная сіла”, у 14:00 — забаўляльна-гульнёвая праграма “Снежны пярэпалах”, у 15:00 — дзіцячая танцавальная праграма, а ў 21:00 — дыскатэка для дарослых наведвальнікаў.
3 студзеня ў 12:00 на навагодні канцэрт у “Арыён” запрашаюцца дарослыя аматары музыкі і песень, а на 14:00 намечана дзіцячая дыскатэка з гульнёвай праграмай.
