Актыўным і зацікаўленым аказалася абмеркаванне вынікаў шостага Усебеларускага народнага сходу ў цэнтры банкаўскіх паслуг № 615 у Глуску рэгіянальнай дырэкцыі па Магілёўскай вобласці ААТ “Белаграпрамбанк”. Сваімі ўражаннямі ад удзелу ў форуме з калектывам цэнтра падзялілася яго начальнік Вольга Каранькова. Вельмі змястоўным было выступленне Прэзідэнта, ён даў ацэнку палітычным падзеям як за мяжой, так і ў нашай краіне і падкрэсліў, што дзякуючы моцнай уладзе сітуацыю ўдалося ўтрымаць пад кантролем. На новую пяцігодку вызначаны правільныя прыярытэты, адзначыла Вольга Рыгораўна, яны так ці інакш датычаць усіх людзей, гэта шчаслівая сям’я, моцныя рэгіёны, інтэлектуальная краіна, дзяржава-партнёр. Супрацоўнікі цэнтра банкаўскіх паслуг пагадзіліся з тым, што для жыхароў невялікіх гарадоў і раённых цэнтраў вельмі важная дзяржаўная падтрымка і па стварэнні новых рабочых месцаў, і па жыллёвым будаўніцтве, будаўніцтве арэнднага жылля. Добра, што запланавана стварэнне рэгіянальных медыцынскіх цэнтраў, пра якое сказаў Прэзідэнт, яны насамрэч павысяць даступнасць і якасць найноўшых медпаслуг для яшчэ большай колькасці насельніцтва. З увагай слухалі работнікі ЦБП і выказвалі свае меркаванні па пытаннях, звязаных з адукацыяй, гэта і ўмовы паступлення абітурыентаў, і падрыхтоўка маладых спецыялістаў, значнае змяншэнне колькасці папер і справаздач, якія зараз патрабуюцца ад настаўнікаў. На думку сабраўшыхся, настаўнік павінен вучыць і выхоўваць, а не правяраць стан жылля ці выконваць іншыя неўласцівыя яму функцыі. Што да атрымання вышэйшай адукацыі, то гэта апошнім часам звязана не з асэнсаваным выбарам той ці іншай прафесіі, атрыманне дыплома ВНУ стала проста мэтай. Прадстаўнікоў больш сталага пакалення гэта і здзіўляе, і непакоіць. Такое актыўнае абмеркаванне вынікаў народнага сходу паказала, што падчас яго правядзення былі агучаны важныя пытанні, закрануты праблемы, пастаўлены планы, якія так ці інакш хвалююць многіх людзей. Цікава супрацоўніцам ЦБП Белаграпрамбанка было паслухаць і пра арганізацыйны бок справы. Па словах Вольгі Караньковай, і самі пасяджэнні, і бытавыя ўмовы, і культурны адпачынак, нягледзячы на вялікую колькасць людзей, былі арганізаваны на вышэйшым узроўні, усе ведалі, калі і куды ісці, што і дзе можна паглядзець. Яна згадала цікавыя экспазіцыі ў Палацы Рэспублікі, дзе былі і старадаўнія экспанаты, у прыватнасці, старажытныя кнігі, і апошнія дасягненні навукі, вельмі спадабаўся вялікі святочны канцэрт, у якім удзельнічалі артысты з усіх абласцей. “Удзел у гэтым народным сходзе, без сумнення, значная падзея ў маім жыцці, — адзначыла Вольга Каранькова. — Планы на пяцігодку пастаўлены, яны правільныя, дакладныя і дасягальныя”.
Т. ЛУКАШЭВІЧ
Фота Г. АЎТУХОВАЙ
