Дзесяць сартоў хлебабулачных вырабаў ад мясцовых хлебапёкаў было прапанавана паспытаць і ацаніць глушчанам падчас дэгустацыі, арганізаванай Глускім райпо. Выстава-дэгустацыя праходзіла 25 лютага ў магазіне “Родны кут” № 1. Там былі і добра знаёмыя спажыўцу глускі “кірпічык”, батон, і заварныя з семачкамі “Новая Рыга”, “Еўрапейскі”, “Старажытны”, які, дарэчы, асабліва падабаецца асіпаўчанам. Былі і навінкі гэтага года — багет з сырам, праснак з сырам, хлеб тоставы, булка посная вотруб’евая, ад ужо знаёмай булкі “Здароўе” яна адрозніваецца большай колькасцю вотруб’я, а значыць, яшчэ больш карысная, і іншыя вырабы. Усю гэту хлебна-булачную разнастайнасць можна было не толькі ацаніць на смак, але і даведацца пра асаблівасці рэцэптуры і прыгатавання, што называецца, з першых вуснаў. Пра навінкі мясцовых хлебапёкаў расказвалі начальнік вытворчага ўчастка райпо Вольга Галінская і начальнік лабараторыі Інеса Зубкевіч. На дэгустацыйным століку ляжалі і кавалачкі, і цэлыя вырабы, каб можна было ўбачыць, як яны выглядаюць на хлебнай паліцы ў магазіне і купіць. Некаторыя пакупнікі, хто ў гэты час заходзіў у “Родны кут”, так і рабілі: каштавалі, распытвалі, а потым ішлі і куплялі.
Адметнай атрымалася размова са спецыялістамі адной пакупніцы, якая ў мінулым больш за 40 гадоў адпрацавала на глускім хлебазаводзе і сама шмат ведае пра тое, як выпякаецца хлеб. Праўда, з таго часу ўмовы працы, ды і сарты вырабаў значна змяніліся, але нязменным, лічыць Анастасія Сямёнаўна Жарнаклёва, застаўся смак глускага хлеба — самы лепшы смак. Другая ж пакупніца, наадварот, даволі скептычна выказалася пра хлебныя навінкі: маўляў, зараз ёсць, але хутка знікнуць, як зніклі ў свой час “Жаночы” і “Мужчынскі” хлеб, які многім спадабаўся. Вольга Галінская запэўніла, што “Мужчынскі” хутка зноў з’явіцца на паліцах магазінаў, неабходныя інгрэдыенты ўжо закуплены. Што датычыць увогуле хлебнага асартыменту ў гандлёвай сетцы, то ён залежыць не столькі ад хлебапёкаў, колькі ад магазінаў, ад пададзеных імі заявак. Масавыя сарты хлебабулачных вырабаў на хлебазаводзе пякуць штодня, а вось палепшаныя — згодна з заяўкамі, растлумачыла яна.
Так, вытворца зацікаўлены вырабляць тую прадукцыю, якая найбольш прадаецца, — гэта зразумела. А значыць, справа за тым, каб вывучаць, ведаць пакупніцкі попыт і своечасова рэагаваць на запыты людзей. І ў дадзеным выпадку гэта не праблема, паколькі і вытворца (хлебазавод), і магазіны (гаворка ідзе пра гандлёвую сетку “Родны кут”) адносяцца да раённага спажывецкага таварыства, дык няўжо ж яны ўнутры адной сістэмы не дамовяцца? Карысць ад гэтага адчуюць абодва бакі, а ў пакупнікоў пашырыцца выбар. Пэўную актыўнасць могуць праяўляць тут і яны: трэба не адыходзіць моўчкі ад хлебных паліц, калі не ўбачылі патрэбнага хлеба, а пытацца ў прадаўцоў, чаму яго няма і калі будзе. Выбар насамрэч можа быць шырокі. У 2020 годзе лабараторыяй Глускага райпо было распрацавана і ўкарэнена 27 найменняў хлебабулачных вырабаў, у тым ліку 13 новых відаў хлеба з жытняй і жытне-пшанічнай мукі, і 30 найменняў кандытарскіх вырабаў.
Т. ЛУКАШЭВІЧ
Фота аўтара
