Глускі лясгас запрашае ўсіх жадаючых паўдзельнічаць у рэспубліканскай добраахвотнай акцыі “Тыдзень лесу”. Яна адбудзецца ўжо ў чатырнаццаты раз і сёлета прысвечана Году народнага адзінства.
Як паведаміў намеснік дырэктара лясгаса Іван Вяргун, на працягу тыдня (з 3 па 10 красавіка) ва ўсіх васьмі лясніцтвах раёна плануюць высадзіць каля 50 гектараў лесу, а таксама ачысціць ад смецця прыдарожныя палосы, і добраўпарадкаваць тры месцы адпачынку: у Кіраўскім, Дакольскім і Завалочыцкім лясніцтвах. У мінулым годзе ў акцыі “Тыдзень лесу” паўдзельнічала болей за 300 жыхароў раёна — прадстаўнікі арганізацый і прадпрыемстаў, работнікі лясгаса, школьнікі, актывісты БРСМ. Лесаводы спадзяюцца, што сёлета збярэцца большая колькасць людзей.
Стаць удзельнікам дабрачыннай акцыі можа кожны. Для гэтага дастаткова звярнуцца ў лясгас або бліжэйшае лясніцтва. Валанцёраў забяспечаць неабходным інвентаром і саджанцамі, вызначаць фронт работ.
