Глускі райспажыўсаюз быў створаны 1 красавіка 1931 года. У яго склад на той час  уваходзілі 19 сельпо: Аземлянскае, Каткаўскае, Бярозаўскае, Лапіцкае, Гарадоцкае, Ляскавіцкае, Годскае, Рудабельскае, Глускае, Парэцкае, Дакольскае, Слаўкавіцкае, Жалвінецкае, Сіманавіцкае, Запольскае, Слабада-Германаўскае, Казловіцкае. У раёне налічвалася 49 гандлёвых кропак. Першым старшынёй праўлення быў абраны І. К. Гладкі. Колькасць пайшчыкаў райспажыўсаюза складала 17 118 чалавек.

Пасля Вялікай Айчыннай вайны Глускі райспажыўсаюз быў адноўлены. У 1946 годзе ў нашым раёне было 14 магазінаў і лавак, таваразварот складаў 948 тысяч рублёў, прадпрыемствы грамадскага харчавання прынеслі ў той год 38,5 тысячы рублёў прыбытку, у таварыстве было 3074 пайшчыкі. У 1950-я гады многа было зроблена ў раёне для паляпшэння гандлю: з’явіліся новыя магазіны, пашырыўся асартымент прамысловых і харчовых тавараў, узрасла культура гандлю. Вясною 1956 года ў Глуску свае дзверы для пакупнікоў адчыніў універмаг. Магазін меў тры аддзяленні: тканін, гатовай вопраткі і галантарэі. Цікавы факт: у гэтым магазіне за першы дзень гандлю насельніцтву было прададзена розных тавараў на 50 тысяч рублёў. Яшчэ адзін папулярны ў Глуску магазін, “Культтавары”, у гэтым жа годзе прадаў насельніцтву 420 веласіпедаў, 16 матацыклаў, 240 швейных машын, 200 радыёпрыёмнікаў, 350 розных гадзіннікаў, 15 патэфонаў.

У 1962 годзе Глускі раён быў ліквідаваны, а мясцовы райспажыўсаюз далучаны да Бабруйскага, у Глуску засталіся толькі сельскія спажывецкія таварыствы. Пасля аднаўлення нашага раёна ў 1966 годзе Глускі райспажыўсаюз быў утвораны зноў. Яго старшынёй стаў М. І. Малашук. У 1967 годзе ў раёне налічвалася 90 гандлёвых кропак.

На сённяшні дзень у склад Глускага спажывецкага таварыства ўваходзяць аддзел прамысловасці, участак грамадскага харчавання, сельскі і Глускі рознічна-гандлёвыя ўчасткі, Асіповіцкае рознічна-гандлёвае прадпрыемства. У Глускім раёне працуюць 35 магазінаў, з якіх 18 — на сяле, 14 — у Глуску. Пяць аўтамагазінаў абслугоўваюць насельніцтва невялікіх вёсак. У раённым спажывецкім таварыстве працуе 376 работнікаў.