Яго працоўны дзень вясной пачынаецца а сёмай раніцы і можа доўжыцца да сямі вечара — такая цяпер пара. Спачатку аглядае, рыхтуе трактар з пасяўным агрэгатам (RABE Meqa Seed), потым выязджае ў поле. “Як быў малады, мог і па шаснаццаць гадзін працаваць, не вылазіць з кабіны, цяпер ужо не тое”, — гаворыць, успамінаючы былое, адзін з найбольш вопытных механізатараў ААТ “Глуская Зара” Васіль Слук і з задавальненнем дадае, што ён ужо дзядуля трох унукаў — а гэты статус сведчыць пра шаноўны ўзрост. Аўтарытэтны чалавек ён і на рабоце — толькі ў статусе сейбіта Васіль Паўлавіч працуе чатырнаццаты сезон, увесь жа механізатарскі стаж і таго большы — бярэ пачатак у 1992 годзе, да гэтага быў вадзіцелем, і таксама ў сельскай гаспадарцы. Так што можна смела сцвярджаць, што пасяўная ў “Глускай Зары” ў надзейных руках (перад гэтым Васіль Слук займаўся падрыхтоўкай глебы).
Неўзабаве ў работу на пнеў-матычнай універсальнай сеялцы уключыцца Андрэй Лазовік. Сяголета гаспадарцы патрэбна пасеяць 450 гектараў яравых зерневых: 120 аўса і 330 ячменю, яшчэ на зерне будзе пасеяна 250 гектараў кукурузы і 1000 гектараў — на зялёны корм. Яравы клін таксама складаюць 40 гектараў грэчкі і 300 гектараў аднагадовых культур на корм жывёле. Восенню быў зроблены добры задзел на ўраджай 2021 года: пасеялі 710 гектараў азімага жыта, 590 гектараў трыцікале і 300 рапсу. Цяпер вядзецца догляд за гэтымі пасевамі, на іх падкормцы заняты тры механізатары, таксама праводзіцца баранаванне азімых культур, падсеў канюшыны, культывацыя глебы, уносяцца калій-ныя і азотныя ўдабрэнні пад сяўбу яравых. Усяго на палявых работах у “Глускай Зары” зараз заняты дзевяць чалавек, арганізавана іх харчаванне — пакуль што ў выглядзе сухіх пайкоў, а калі палявыя работы стануць больш масавымі, будуць карміць гарачымі абедамі.
З Васілём Слукам і начальнікам ўчастка Нінай Грабко мы сустрэліся 30 сакавіка на полі, што за Бабровічамі. Па словах спецыяліста, гэта трэці дзень пасяўной у гаспадарцы, пачалі з аўса: за першым разам было пасеяна 18 гектараў гэтай культуры, на другі дзень — 21, з 34-гектарным полем каля Бабровіч вопытны механізатар таксама павінен справіцца за дзень, адзначыла начальнік участка, а ўвогуле трэба пастарацца і пасеяць раннія зерневыя за дзесяць дзён.
Т. ЛУКАШЭВІЧ
Фота Г. АЎТУХОВАЙ
