У сакавіку, на вясновых канікулах, прайшлі раённыя алімпіяды сярод школьнікаў чацвёртых — дзявятых класаў. Удзельнічалі ў іх 278 навучэнцаў школ раёна, у тым ліку 54 вучні сельскіх школ, паведамілі рэдакцыі ў аддзеле па адукацыі, спорце і турызме. Самымі запатрабаванымі аказаліся на гэты раз моўныя алімпіяды. Больш за паўсотні ўдзельнікаў сабрала алімпіяда па рускай мове і літаратуры — 52 вучні, на алімпіядзе па беларускай мове і літаратуры свае веды праверылі 46 чалавек, а па англійскай мове — 30. Усяго ж іспыты праводзіліся па 14 вучэбных прадметах.
Дыпломы 1-й, 2-й і 3-й ступені атрымалі 125 удзельнікаў, яшчэ 21 удзельніка ўзнагародзілі заахвочвальнымі дыпломамі. Найбольшую колькасць дыпломаў прынеслі сваім настаўнікам навучэнцы гімназіі (46) і СШ № 1 імя С. І. Грахоўскага (43). Больш за дваццаць чалавек атрымалі па два дыпломы, і чатыры вучні заваявалі па тры дыпломы. Гэта сямікласнік гімназіі Сцяпан Касцюкевіч, шасцікласнікі СШ № 2 Міхаіл Трыбуш і Соф’я Фёдарава, пяцікласнік Заеліцкага НПК Яўген Цяцерын.
Традыцыйна ў алімпіядах многа ўдзельнічала чацвёртакласнікаў, тых, што займаюцца пакуль што ў адной настаўніцы. Удзельнічалі, трэба сказаць, рэзультатыўна і парадавалі сваіх настаўніц вялікай колькасцю дыпломаў па розных прадметах. Напрыклад, вучні Алены Іванаўны Варонінай з сярэдняй школы № 1 заваявалі 12 дыпломаў розных ступеняў, Кулінок Алены Канстанцінаўны з гімназіі — 11 дыпломаў, Галіны Анатолеўны Русаковай з СШ № 2 — 10 дыпломаў. Што да настаўнікаў-прадметнікаў, асабліва адзначыліся вучні Алены Аляксандраўны Вяргейчык (СШ № 1, геаграфія), Юліі Уладзіміраўны Грабяньковай (гімназія, англійская мова), Аксаны Міхайлаўны Грыгор’евай (гімназія, Усцярхоўскі НПК, абслугоўваючая праца) — па 6 дыпломаў рознай вартасці, Ірыны Віктараўны Пукач (Заеліцкі НПК, беларуская мова і літаратура), Таццяны Іванаўны Маскаленкі (СШ № 2, біялогія) — па 5 дыпломаў.
