Першымі ў Глускім раёне да сяўбы кукурузы прыступілі ў аграфірме “Слаўгарадскі”. У мінулую сераду, 21 красавіка, кіпела работа на 78-гектарным полі “Далёкае” каля Малінава. Першым на кукурузным палетку мы ўбачылі механізатара Аляксандра Гаравікова. На МТЗ-3522 у звязцы з бараной ён падрыхтоўваў глебу пад сяўбу кукурузы. У руках адказнага працаўніка са шматгадовым стажам тэхніка ішла лёгка і паслухмяна. Працуе механізатар з раніцы да вечара са спадзяваннямі на добры ўраджай. Адсеяўшы авёс і ячмень, узяўся за падрыхтоўку палеткаў пад кукурузу. “Работы шмат, — гаворыць Аляксандр Гаравікоў, — даражым кожнай хвілінай, тэхніка і надвор’е пакуль не падводзяць, справа спорыцца, таму і настрой добры”.
Механізатар Аляксандр Гаравікоў падрыхтоўвае палеткі пад кукурузу
Побач з Гаравіковым закладваць будучы ўраджай кукурузы на трактары МТЗ-920 з сеялкай збіраўся не менш вопытны трактарыст Аляксандр Кірылаў. Адказную справу яму давяраюць ужо не першы год, неаднаразова ён быў лідарам на сяўбе царыцы палёў. У сеялку засыпалі насенне айчыннай селекцыі. Дарэчы, 26 тон яго набылі ў эксперыментальнай базе “Крынічная” Светлагорскага раёна. Кантралявалі ўвесь працэс кіраўнік аграфірмы Уладзімір Штылёў і начальнік участка Уладзімір Мароз, яны пільна аглядалі пасяўны агрэгат, механізмы, пасля правяралі глыбіню задзелкі насення ў глебу. Па словах спецыялістаў, насенне добрае, глеба падрыхтавана, унесены калій, у свой час будуць зроблены хімпраполкі і падкормкі.
Перад сяўбой пільна аглядаюць тэхніку начальнік участка Уладзімір Мароз, трактарыст Аляксандр Кірылаў, кіраўнік аграфірмы Уладзімір Штылёў
На загрузцы насення ў сеялку — палявод Эдуард Рудак
У першы дзень “слаўгарадчане” пасеялі кукурузу на 15 гектарах. Пасля тэмп крыху нарасцілі, і за тры дні засеялі ўсе 78 гектараў каля Малінава. Пасля перайшлі працаваць на поле ў Слаўкавічах, дзе ў мінулую нядзелю , 25 красавіка, засеялі яшчэ 30 гектараў. На гэтым тыдні чакаюць аграрыяў і другія кукурузныя палеткі. І ёсць усе падставы спадзявацца на добры ўраджай, бо механізатары для гэтага стараюцца, спецыялісты сочаць за выкананнем тэхналогій, праца ідзе сваім вызначаным парадкам.
Г. АЎТУХОВА
Фота аўтара
