Пра страхаванне і крэдытаванне расказвалі глушчанам на чарговым пасяджэнні клуба “Маладая мама”
Маладым сем’ям наладжваць сваё жыццё нялёгка: не паспелі хлопец і дзяўчына прывыкнуць да статуса мужа і жонкі, як набываюць яшчэ адзін — бацькі і маці. Гэта і псіхалагічнае напружанне, і фізічнае, зноў жа клопаты пра жыллё, бытавую тэхніку, мэблю, адказнасць за ўсё гэта, адно за аднаго і за сваё малое, а то ўжо і за двух. Работнікі сацыяльна-педагагічнага цэнтра Глуска ў адзін з дзён Тыдня моладзі запрасілі маладых мам на пасяджэнне клуба “Маладая мама” і наладзілі для іх сустрэчу са спецыялістамі Белдзяржстраха і Беларусбанка.
Непрадказальныя сітуацыі з дарослымі і дзецьмі (хвароба або няшчасны выпадак), з іх жыллём або маёмасцю (вы залілі вадой суседзяў, суседзі залілі вадою вас) здараюцца нярэдка, ад гэтага, як гаворыцца, ніхто не застрахаваны, але ж калі ў вас аформлена страхоўка, то гэта пры наступленні няшчаснага выпадку дапаможа вам перажыць яго з меншымі стратамі, таму што вы атрымаеце поўную або частковую кампенсацыю. Пра віды страхавання, прывёўшы канкрэтныя прыклады з жыцця, маладым мамам расказала спецыяліст першай катэгорыі аддзела па аказанні страхавых паслуг па Глускім раёне прадстаўніцтва Белдзяржстраха па Бабруйску і Бабруйскім раёне Ганна Ганчарова.
Застрахаваць жыллё, маёмасць, жыццё і здароўе ад няшчасных выпадкаў і нават сваю плацёжную картку (да прыкладу, ад дзеянняў трэціх асоб, прасцей кажучы, махляроў) можна і ў Беларусбанку, які супрацоўнічае і з Белдзяржстрахам, і з іншымі страхавымі кампаніямі, расказала загадчык сектара рознічнага і карпаратыўнага бізнесу цэнтра банкаўскіх паслуг № 707 ААТ “ААБ Беларусбанк” Жанна Малаковіч. Калі ж свайго жылля ў маладой сям’і яшчэ няма, у гэтым выпадку таксама можна звяртацца ў банк і скарыстацца сістэмай будаўнічых зберажэнняў або крэдытам на набыццё жылых памяшканняў “Іпатэка экспрэс”.
Намеснік дырэктра СПЦ Вікторыя Сыцька выказала спадзяванне, што ўсё пачутае было карысным для маладых мам (яны і насамрэч абодвум спецыялістам задавалі пытанні, цікавіліся, як лепш паступіць у тых ці іншых канкрэтных жыццёвых абставінах), і запрасіла іх стаць актыўнымі і пастаяннымі наведвальнікамі клуба “Маладая мама”, раздала маляўнічыя інфармацыйна-асветніцкія буклеты.
Т. ЛУГАВАЯ
Фота аўтара