Першы званок у санаторнай школе
Адзвінела звонкае лета, і зноў прыйшла да нас залатая восень, а з ёй — і час сустрэчы са школай. У Глуску, акрамя звычайных агульнаадукацыйных школ і гімназіі, ёсць і асаблівая — санаторная школа-інтэрнат для дзяцей з саматычнай паталогіяй. Адукацыйны працэс тут вядзецца з другога па дзявяты класы. Сяголета яе навучэнцамі сталі 110 хлопчыкаў і дзяўчынак з розных раёнаў нашай вобласці. Адны прыехалі сюды ўпершыню, другія ўжо знаёмыя і са школай, і з яе настаўнікамі, выхавацелямі і могуць лічыць сябе старажыламі.
Першага верасня тут, як і ва ўсіх школах раёна, празвінеў першы званок. З пачаткам новага навучальнага года вучняў, педагогаў і ўсіх работнікаў школы павіншавала яе дырэктар Святлана Лісіца, вельмі хацелася б, каб для прыехаўшых сюды дзяцей санаторная школа стала сапраўды другім домам, адзначыла яна. Школа — гэта не толькі вучоба, гэта сябры, гэта конкурсы, спаборніцтвы, выступленні — быць актыўнымі, жыць цікавым жыццём, паважаць і слухацца настаўнікаў і выхавацеляў, клапаціцца пра сваё здароўе пажадалі вучням санаторнай школы іх госці — намеснік генеральнага дырэктара Магілёўскага лесагаспадарчага аб’яднання Сяргей Шах, дырэктар Глускага лясгаса Сяргей Максімовіч, галоўны ўрач раённай бальніцы Ірына Пятрова. Да Дня ведаў падарункам школе ад шэфаў — Міністэрства лясной гаспадаркі і Глускага лясгаса — стаў сертыфікат на 35 тысяч рублёў. Падзячныя пісьмы Міністэрству і лясгасу дырэктар школы Святлана Лісіца перадала Сяргею Максімовічу, у іх — падзяка ад кіраўніцтва, працоўнага калектыву і вучняў школы за дапамогу ў падрыхтоўцы да новага навучальнага года, а таксама пажаданні плёну ў працы, добрага здароўя і шчасця. “Будзь шчаслівы, кожны чалавек!” — песню-пажаданне з такімі словамі падарыла дзецям і дарослым педагог школы Валянціна Хлань, а вучаніца Ніна Ракавец прачытала прыгожы верш пра школу. Няхай спраўдзяцца ўсе сказаныя пажаданні, няхай збудуцца спадзяванні, няхай цікавым і насычаным на добрыя падзеі і адкрыцці будзе гэты навучальны год.
Т. ЛУГАВАЯ
Фота А. ЗМІТРОВІЧ