У Глуску адсвяткавалі Дзень народнага адзінства
“У адзінстве народа — адзінства краіны!” — так называлася ўрачыстасць, якая прайшла ў Глуску 17 верасня з нагоды новага дзяржаўнага свята — Дня народнага адзінства. У фае кінатэатра “Арыён” — тэматычны стэнд, прыгожая фотазона, выстава зброі, экіпіроўкі, абмундзіравання, рыштунку часоў Айчыннай вайны, падрыхтаваная ўдзельнікамі ваенна-гістарычнага клуба “Салдаты Перамогі”, тэматычны куток ад раённага краязнаўчага музея і жывое гучанне флейты. Усё гэта стварала адчуванне свята ўжо на ўваходзе, да пачатку ўрачыстасці.
У зале — прадстаўнікі працоўных калектываў, моладзь, ветэраны працы. “Згуртаванасць, салідарнасць і ўзаемаразуменне беларусаў, аб’яднаных гісторыяй, традыцыямі, культурай і духам роўнасці і павагі, — гэтыя якасці заўсёды былі галоўнымі для нашага народа, такімі і павінны заставацца”, — сказаў у прывітальным слове старшыня Глускага раённага выканаўчага камітэта Сцяпан Чачуха. Наша агульная мэта — моцная і квітнеючая Беларусь, краіна, у якой камфортна і бяспечна жыць, дзе людзі сваёй працай і сваім талентам могуць дабівацца поспеху. Дасягнуць гэтага можна толькі разам, не адступаючы перад цяжкасцямі і выпрабаваннямі, падкрэсліў ён. Сцяпан Чачуха падзякаваў усім, хто ў няпростыя часы падтрымаў мір на нашай зямлі, ён павіншаваў прысутных са святам і пажадаў усім шчасця і дабра, поспехаў у працы на карысць Радзімы.
З нагоды свята шэраг глушчан адзначылі ўзнагародамі. За актыўную жыццёвую пазіцыю і значны асабісты ўклад у развіццё і рэалізацыю дзяржаўнай моладзевай палітыкі Ганаровай граматай галоўнага ўпраўлення ідэалагічнай работы і па справах моладзі Магілёўскага аблвыканкама ўзнагароджаны Віктар Харытонаў, старшы ўчастковы інспектар раённага аддзела ўнутраных спраў. Падзячныя пісьмы Глускага райвыканкама за актыўную грамадскую дзейнасць, праяўлены патрыятызм, прынцыповую стойкасць і цвёрдасць перакананняў, асабісты ўклад ва ўмацаванне асновы дзяржаўнасці і ў сувязі з Днём народнага адзінства атрымалі: дырэктар раённага краязнаўчага музея Наталля Акуліч, маёр міліцыі запасу, інжынер па допуску транспартных сродкаў да ўдзелу ў дарожным руху УП “Белтэхагляд” па Магілёўскай вобласці Андрэй Грамыка, падпалкоўнік у адстаўцы Валерый Сураўнёў, начальнік адасобленай групы (Глускага раёна) ваенкамата Бабруйска, Бабруйскага, Глускага і Кіраўскага раёнаў маёр Сяргей Корбут і спецыяліст па тэхнічнай інвентарызацыі Глускага бюро Бабруйскага філіяла РУП “Магілёўскае агенцтва па дзяржаўнай рэгістрацыі і зямельным кадастры” Раман Тычына (абодва — члены клуба “Салдаты Перамогі”), дырэктар Завалочыцкага НПК Наталля Шылава, падпалкоўнік міліцыі ў адстаўцы Уладзімір Шчука, Уладзімір Чабан, Людміла Клыга. Людміла Аляксандраўна падзякавала за віншаванне, за памяць. Нас аб’ядноўвае пачуццё патрыятызму, адзначыла яна, але патрыятызм — гэта не жаданне браць ад сваёй Радзімы ўсё, што яна здольна даць, а гатоўнасць зрабіць для яе ўсё, што можаш сам, што ў тваіх сілах. На нашай зямлі на працягу стагоддзяў жылі людзі розных нацыянальнасцяў, розных веравызнанняў, жылі мірна, захоўвалі паміж сабой згоду, гэта стала візітоўкай Беларусі, гэтым мы можам ганарыцца, а яшчэ — любіць сваю Радзіму, не таму, што яна вялікая ці маленькая, а таму, што яна наша, заклікала Людміла Клыга. Так, якія б ветры не шумелі над Беларуссю, нашы моцныя традыцыі, народная памяць, беларуская культура аб’ядноўваюць людзей. Кожны разумее, што толькі разам можна будаваць моцную і прыгожую краіну, краіну, якой можна ганарыцца.
Да Дня народнага адзінства мясцовыя работнікі культуры падрыхтавалі добрую канцэртную праграму — лаканічную, дынамічную, разнастайную, дзе ўсе нумары — да месца. Асобна хочацца ім падзякаваць за ўменне адшукваць новыя таленты, даваць ім магчымасць раскрыцца, праявіць сябе. Гэта яшчэ раз пераконвае, што Глушчына — добры край таленавітых людзей. За гэта мы яе і любім. А яшчэ таму — што яна наша.
Таццяна ЛУКАШЭВІЧ
Фота Ганны АЎТУХОВАЙ