Да Дня народнага адзінства ў Глуску прайшлі напярэдадні і праходзяць сёння культурна-масавыя, спартыўныя і іншыя мерапрыемствы. У сераду на гарадскім стадыёне адбыўся прымеркаваны да гэтага свята лёгкаатлетычны прабег сярод школьнікаў пятых — адзінаццатых класаў, арганізатарамі яго выступілі раённы аддзел па адукацыі, спорце і турызме і грамадскае аб’яднанне “Белая Русь”. Учора вечарам там жа сустрэліся каманды па міні-футболе арганізацый і прадпрыемстваў райцэнтра. Сёння ў гімназіі пройдзе злёт раённай піянерскай арганізацыі і ва ўсіх установах адукацыі запланаваны тэматычныя інфармацыйныя і класныя гадзіны, заняткі, выставы творчых работ і фатаграфій і іншыя мерапрыемствы. Выставы, краязнаўчыя гадзіны, пазнавальныя праграмы, сустрэчы і канцэрты падрыхтаваны таксама ў бібліятэках і клубных установах раёна. У Цэнтры культуры і вольнага часу “Арыён” на сёння запланавана ўрачыстасць з удзелам прадстаўнікоў працоўных калектываў “У адзінстве народа — адзінства краіны!”. І гэта няпоўны пералік тых разнастайных мерапрыемстваў, што прайшлі і праходзяць гэтымі днямі ў нашым раёне. Акрамя таго, дэлегацыі Глушчыны прымаюць удзел у святочных мерапрыемствах у абласным цэнтры і Мінску.
