“Нашы людзі”. Трактарыст-машыніст Васіль Вежнавец
Прафесія ў Васіля Вежнаўца, мабыць, самая распаўсюджаная ў сельскагаспадарчай галіне, ён трактарыст-машыніст, механізатар. Працуе ў адкрытым акцыянерным таварыстве “Зара Камуны”, на энерганасычаным трактары МТЗ-3022. Стаж яго работы ў гэтай гаспадарцы перавышае дзесяць гадоў. Не сказаць, каб гэта занадта шмат (ёсць і больш вопытныя па гадах трактарысты), але дастаткова, каб механізатар мог сябе праявіць, і дастаткова, каб адказнага і талковага работніка маглі заўважыць і па годнасці ацаніць яго старанне. Прычым не толькі ў сваім калектыве. Васіль Вежнавец па выніках работы за 2020 год быў прызнаны пераможцам раённага спаборніцтва сярод работнікаў вядучых прафесій і атрымаў званне лепшага механізатара. Летась пра яго, як пра аднаго з лепшых механізатараў гаспадаркі, занятых на веснавой сяўбе ў “Зары Камуны”, пісала наша раённая газета. Ухвальна ў размове з карэспандэнтамі пра яго адазваўся і галоўны аграном Валерый Шарстнёў, адзначыў, што за адказнасць і старанне ў гаспадарцы менавіта гэтаму механізатару давяраюць найбольш важную работу.
Самому Васілю Васілевічу, па яго ж словах, больш даспадобы менавіта сяўба: засыпаў зерне ў сеялку і едзь па падрыхтаваным роўным полі. Але праца механізатарам выпадае розная, і хапае яе круглы год. Сам ён, як увесну адсеяўся і летам пайшла ў рост трава, быў заняты на касьбе, восенню араў глебу і зноў сеяў — азімыя культуры, не сядзеў без работы і зімой — вывозіў арганіку. Вось так ад сезона да сезона, ад аднаго віда работ да другога ён за 2021 год выпрацаваў 4862 умоўныя эталонныя гектары — пры высокай якасці работ і пры эканоміі паліва ў 60 літраў. І гэта, трэба сказаць, зноў адзін з лепшых паказчыкаў у раёне. А сакрэтам і галоўнай умовай свайго поспеху Васіль Вежнавец называе саму працу: каб паспяхова працаваць, трэба найперш працаваць. Не гнацца за лепшым, лягчэйшым, больш выгадным ці выйгрышным, а ісці і працаваць, добра, якасна, сумленна. Тады і поспех будзе, прызнанне і павага. Зрэшты, так і выходзіць: прайшоўшай восенню Васіль Вежнавец, як адзін з перадавых механізатараў, у складзе дэлегацыі Глускага раёна ездзіў на абласныя “Дажынкі”, там ва ўрачыстай абстаноўцы яму была ўручана Падзяка Міністэрства сельскай гаспадаркі і харчавання Рэспублікі Беларусь. Заслужыў.