Калісьці, яшчэ ў пачатку ХХ стагоддзя, жанчыны, якія змагаліся за свае правы, вырашылі аб’явіць 8 сакавіка Міжнародным жаночым днём. І добра, што гэта дата выпала на сакавік, першы месяц вясны, бо вясна вельмі падобная на жанчыну: такая ж прыгожая, імклівая, крыху капрызніца, але ж усё роўна добрая, шчырая і пяшчотная. У Дзень жанчын і напярэдадні яго ў нашай краіне прынята мілым дамам дарыць падарункі, гаварыць кампліменты (больш чым звычайна) ды пажаданні.
Так, напярэдадні Дня жанчын да ветэрана Вялікай Айчыннай вайны Ніны Уладзіміраўны Кульбы завіталі госці. Павіншаваць яе з надыходзячым святам прыйшлі старшыня Глускага раённага Савета дэпутатаў Вячаслаў Асташэвіч, старшыня раённай ветэранскай арганізацыі Тамара Толсцік, начальнік упраўлення па працы, занятасці і сацыяльнай абароне райвыканкама Алена Кірэй і начальнік адасобленай групы (Глускага раёна) ваеннага камісарыята
г. Бабруйска, Бабруйскага, Глускага і Кіраўскага раёнаў Сяргей Корбут. Ніна Уладзіміраўна сустрэла гасцей, як і заўсёды, у добрым настроі, з усмешкай. Госці жадалі жанчыне-ветэрану, каб здароўе не падводзіла, а дзеці, унукі ды праўнукі цешылі сваім клопатам і ўвагай. Ніна Уладзіміраўна прымала віншаванні, кветкі, падарункі, дзякавала за іх і за ўвагу да сябе.
В. ЯНУШЭЎСКАЯ
Фота аўтара
