Сяголета Глускі раён на абласным конкурсе “Сям’я года” прадставіла сям’я Лубковых з Глуска
Дрэва трымаецца каранямі, а чалавек сям’ёй. Згода ды лад у сям’і лепш, чым скарб. Калі сямейка ўмесце, дык і душа на месцы. Так коратка і ёміста наш народ выказаў свой погляд на сям’ю, падкрэсліваючы яе важнасць: сямейны лад за ўсё даражэй. Але ж дабіцца гэтага ладу не так і проста: сямейны гаршчок заўсёды кіпіць. Для чалавека сям’я — яго тыл і надзейны падмурак, а для грамадства — яго аснова, неад’емная частка. А яшчэ сям’ю называюць маленькай дзяржавай, і вялікая дзяржава стараецца яе ўсяляк падтрымліваць, мацаваць.
У нашай краіне распрацавана цэлая сістэма для падтрымкі сем’яў, для дапамогі бацькам у выхаванні дзяцей. На асаблівым становішчы ў Беларусі — шматдзетныя сем’і, гэта значыць сем’і, дзе выхоўваецца трое і больш дзяцей (ад нуля да васямнаццаці гадоў).
Па даных раённага цэнтра сацыяльнага абслугоўвання насельніцтва, на 1 мая ў Глускім раёне пражывае 186 мнагадзетных сем’яў, дзе выхоўваецца 619 дзяцей. Больш за ўсё сярод іх сем’яў з трыма дзецьмі — 145, па чацвёра малых гадуецца ў 27 сем’ях, па пяцёра — у дзесяці, у трох сем’ях па шэсць сыноў і дачок, самая вялікая сям’я, з васьмю дзецьмі, адна. Сяголета статус мнагадзетных у раёне атрымалі восем сем’яў.
Значнай дапамогай шматдзетным з’яўляецца налічэнне ім сямейнага капіталу. Пачынаючы з 2015 года такая ра-завая выплата была назначана 199 сем’ям нашага раёна, у тым ліку па васьмі сем’ях такое рашэнне прынята ўжо ў бягучым годзе. Распарадзіцца сямейным капіталам можна пасля 18-годдзя дзіцяці, з нараджэннем якога капітал быў налічаны. Але ёсць з гэтага правіла выключэнне: датэрмінова патраціць грошы можна на платнае лячэнне кагосьці з членаў сям’і, рашэнне жыллёвага пытання і некаторыя іншыя патрэбы. У нашым раёне такое права выкарысталі 67 шматдзетных сем’яў, усе — на паляпшэнне жыллёвых умоў.
Пятнаццатага мая ў Беларусі адзначаецца Дзень сям’і. Да гэтай даты быў прымеркаваны абласны этап пятага рэспубліканскага конкурсу “Сям’я года”. Ён праходзіў учора ў Магілёве. Сярод шасці яго ўдзельнікаў была і сям’я глушчан Лубковых. Калі рыхтаваўся гэты матэрыял да друку, мы не ведалі вынік іх выступлення. Але якім бы ён ні быў, мы дзякуем Паўлу, Наталлі і іх дачушкам Дзіяне, Альбіне і Сафіі за іх старанне, віншуем іх, а таксама ўсіх, хто ўзяў на сябе смеласць і працу стварыць сям’ю, са святам і зычым усім шчасця.
Т. ЛУКАШЭВІЧ
Фота Г. АЎТУХОВАЙ
