Здаецца, няма той работы ў полі якая б не была знаёма гэтым хлопцам. Пэўна, няма і аднаго чалавека ў нашым раёне, каму б не было знаёмым прозвішча гэтых хлопцаў. Гаворка пра братоў Філіпенкаў з аграфірмы “Слаўгарадскі”. Вось дзе ўжо спрытныя, спраўныя, увішныя, што на сяўбе ці на касавіцы, на жніве ці на ворыве.

Так і сёлета Аляксандр і Яўген Філіпенкі шчыруюць на палетках “Слаўгарадскага” з ранняй вясны. Узараць тое, што засталося з восені, унесці ўдабрэнні і ўгнаенні, падрыхтаваць глебу, засеяць — работы ў гаспадарцы хапае, і браты разам з іншымі механізатарамі працуюць аддана і адказна. Так, як прывыклі. Нездарма штогод іх імёны гучаць сярод імёнаў тых, хто праслаўляе сваю гаспадарку і свой раён шчырай працай. Пачынаецца корманарыхтоўка, пасля ўборачная, і можна быць упэўненымі, што мы яшчэ не раз за сезон сустрэнем братоў Філіпенкаў на палях, а іх прозвішчы — у спісе лепшых працаўнікоў. Так, як заўсёды. Вынікі сяголетняй пасяўной падвядуць пазней, а вось у мінулым годзе Яўген Філіпенка стаў першым у раёне на ўнясенні арганічных удабрэнняў, а Аляксандр Філіпенка — другім на ўзворванні. 

Дарэчы, іх калега Аляксандр Гаравікоў летась таксама адзначыўся ў час пасяўной і стаў лепшым у намінацыі “Сяўба яравых зерневых і зернебабовых культур”. Вопытны механізатар, у гэтым годзе ён у асноўным заняты на падрыхтоўцы глебы, і на яго рахунку каля тысячы падрыхтаваных да сяўбы гектараў. А ўвогуле Аляксандр Анатолевіч таксама можа і за штурвалам камбайна працаваць, і сеялку яму можна смела давяраць, і іншай работы не цураецца і спраўляецца з ёй на выдатна.

Сярод тых, хто шчыруе сёлета ў “Слаўгарадскім” на пасяўной, і малады механізатар Уладзімір Грашчанка. Малады па гадах, а вопыту не займаць, бо ў гаспадарцы працуе не першы год. Між іншым, калі толькі прыйшоў у “Слаўгарадскі”, адразу трапіў на адказны ўчастак — разам з бацькам саставіў зернеўборачны экіпаж. Можна сказаць, на ўборцы ўраджаю прайшоў баявое сельскагаспадарчае хрышчэнне, і прайшоў удала. Прынамсі, яшчэ колькі год назад у гаспадарцы адзначалі, што ёсць у хлопца і жаданне працаваць, і механізатарскі талент, і любоў да зямлі.

Пачаў пасяўны сезон — 2022 Уладзімір Грашчанка на ўзворванні, а завяршыў сейбітам, па стане на 2 чэрвеня на яго рахунку было 558 засеяных кукурузай гектараў.