Прыемная навіна чакала вадзіцеля аграфірмы “Слаўгарадскі” Сяргея Хількевіча ў мінулую пятніцу, 29 ліпеня. Зрабіў ён свой чарговы рэйс з поля на зерняток і даведаўся, што першым у раёне перавёз тысячу тон збожжа.

Вопытны вадзіцель працуе ў гаспадарцы больш за 35 гадоў, другі сезон заняты на адвозцы зерневых. Рэйс за рэйсам, з раніцы да вечара на МАЗе-555112 рупліва дастаўляе ад чатырох камбайнаў новы ўраджай на зернесушыльныя комплексы. Напачатку адвозіў трыцікале, зараз — жыта, пасля яго пераключыцца на кукурузу. За працоўны дзень, пры добрым надвор’і, перавозіць да 100 тон збожжа.

Перадавіка засталі ў полі каля Малінава. Павіншаваць з працоўным дасягненнем вадзіцеля-тысячніка першага жніўня прыехалі старшыня Глускага райвыканкама Уладзімір Кніга, старшыня раённага Савета дэпутатаў Вячаслаў Асташэвіч, старшыня раённай арганізацыі прафсаюза работнікаў АПК Генадзь Ліпскі, старшыня раённага аб’яднання прафсаюзаў Сяргей Слічонак, галоўны спецыяліст аграфірмы “Слаўгарадскі” Вікторыя Самусева. Прыйшлося Сяргею Хількевічу зрабіць перапынак, каб пачуць словы ўдзячнасці за добрасумленную працу, пажаданні дабрабыту і далейшых поспехаў, прыняць Падзяку райкама прафсаюза работнікаў АПК, Ганаровую грамату роднай гаспадаркі, грашовыя прэміі.

Некалькі хвілін на адпачынак з прыемнай нагоды… І зноў пара за справу брацца. Спяшацца за руль свайго МАЗа і далей працаваць-шчыраваць, курсіраваць па знаёмым маршруце з каштоўным хлебным грузам.

Г. АЎТУХОВА

Фота аўтара