На даху цэнтральнай часткі будынка Свята-Богаяўленскага храма Глуска і на шпілі званіцы 21 кастрычніка ўстаноўлены купалы і крыжы
На даху цэнтральнай часткі будынка Свята-Богаяўленскага храма Глуска і на шпілі званіцы ўстаноўлены купалы і крыжы. За працай спецыяльнай тэхнікі і спецыялістаў-высотнікаў, якія выконвалі гэтую спецыфічную работу, глушчане, дарослыя і дзеці, назіралі ў мінулую пятніцу, 21 кастрычніка.
У царкоўным двары было мнагалюдна яшчэ і таму, што малебен служыў епіскап Бабруйскі і Быхаўскі Серафім.
Асвяціўшы крыж, які гэтым жа днём увянчаў шпіль званіцы, уладыка павіншаваў усіх прысутных з завяршэннем такіх доўгіх і цяжкіх работ. Крыж нагадвае нам пра тую вялікую ахвяру і вялікую Божую любоў, якая была яўлена на Галгофе. Гледзячы на крыжы, будзем памятаць пра гэты прыклад любові і ахвяры, дадзены нам Богам. Епіскап Серафім таксама павіншаваў прысутных і з Днём бацькі, ён адзначаўся ў нашай краіне ўпершыню, і да яго ўсе маюць дачыненне, бо ў кожнага чалавека ёсць бацька, хтосьці і сам стаў бацькам. А ва ўсіх нас ёсць Бог-айцец, Ён Тварэц і Ён Любоў. Прыклад любові з Яго павінны браць усе бацькі, адносіцца з любоўю да сваіх блізкіх, да сваёй сям’і. За ўвагу, за добрыя словы і настаўленні, дадзеныя глушчанам, уладыку падзякаваў старшыня Глускага райвыканкама Уладзімір Кніга і выказаў спадзяванне на далейшае супрацоўніцтва.