Шчырая падзяка мамам. Шчырая падзяка ад мам
На ўваходзе жанчын віншавалі з Днём маці і давалі ім святочныя паштоўкі (гэта пастараліся актывісты БРСМ), а на выхадзе жанчыны ўсміхаліся і хвалілі канцэрт, усю святочную праграму, адна сказала, што добра, але мала. Па мне, дык хапіла ўсяго: і віншавальных цёплых слоў, і прыгожых песень з танцамі.
У Глуску 14 кастрычніка ў кінатэатры “Арыён” адбылася ўрачыстасць, прысвечаная Дню маці. У зале — прадстаўніцы працоўных калектываў, жанчыны-ветэраны. З віншавальнымі словамі да іх звярнуўся старшыня раённага выканаўчага камітэта Уладзімір Кніга. Сведчаннем увагі да жанчын-маці з’яўляецца Указ Прэзідэнта, згодна з якім дзень 14 кастрычніка ў нашай краіне аб’яўлены Днём маці. І зусім невыпадкова, адзначыў Уладзімір Валянцінавіч што гэтае дзяржаўнае свята супадае з праваслаўным святам Пакрова Прасвятой Багародзіцы, якая лічыцца ідэалам Маці для ўсіх хрысціян.
У Глускім раёне зараз пражываюць 49 жанчын, якія нарадзілі і выхавалі пяць і болей дзяцей і за гэта ўдастоены ордэна Маці. А ўсяго ў нас 189 шматдзетных сем’яў, дзе выхоўваецца 633 дзіцяці. Асобную падзяку Уладзімір Кніга выказаў мамам, якія ўзялі на сябе выхаванне дзяцей-сірот і дзяцей, што засталіся без бацькоўскай апекі, падзякаваў бабулям — захавальніцам сямейных традыцый, добрым настаўніцам сваіх унукаў.
Кіраўнік раёна пажадаў усім жанчынам міру і цяпла, любові і згоды ў сем’ях, добрага здароўя і радасці ад дзяцей і ўнукаў. Высокую жаночую ўзнагароду — ордэн Маці (згодна з Указам Прэзідэнта № 267) — Уладзімір Валянцінавіч пад гарачыя апладысменты залы ўручыў Таццяне Емяльянавай. Работу шматдзетнай мамы Таццяна Іванаўна паспяхова сумяшчае з работай прыбіральшчыцы памяшканняў санаторнай школы-інтэрната.
Падзячныя пісьмы за значны асабісты ўклад у захаванне традыцыйных сямейных каштоўнасцей, дастойнае выхаванне дзяцей і ў сувязі са святкаваннем Дня маці з рук кіраўніка раёна атрымалі жанчыны-маці, прадстаўніцы розных прафесій: Дзіна Бадунова — спецыяліст па кадрах раённага цэнтра сацыяльнага абслугоўвання, Тамара Дзярбеева — бухгалтар Дакольскага лясніцтва, Вольга Кашко — галоўны спецыяліст сектара рознічнага і карпаратыўнага бізнесу Цэнтра банкаўскіх паслуг Беларусбанка, Святлана Кушаль — бухгалтар глускага “Жылкамгаса”, Наталля Лубкова — выхавацель дзіцячага сада № 4, Ірына Маслава — санітарка раённага цэнтра гігіены і эпідэміялогіі, Наталля Медзвядок — прыбіральшчыца памяшканняў Бярозаўс-кага сельскага Дома культуры, Анжаліка Мышкавец — электраманцёр па эскізіраванні трас ЛЭП Глускага раёна электрычных сетак, Алена Пятрова — настаўнік выяўленчага мастацтва гімназіі, Ганна Сосікава — намеснік загадчыка дзіцячага сада № 4, Надзея Ткачова — бухгалтар Цэнтра па забеспячэнні дзейнасці бюджэтных арганізацый.
Для іх і для ўсіх жанчын-мам, што прыйшлі на ўрачыстасць, ад самых юных, чые першыя дзеткі робяць толькі першыя крокі, да шматдзетных мам, мам са стажам, якія ўжо сталі бабулямі, а то і прабабулямі, быў наладжаны канцэрт. Паўтаруся, што праграма атрымалася сапраўды прыгожай, годнай, праграма проста атрымалася — і на ўзроўні задумкі, і на ўзроўні яе цудоўнага ўвасаблення. Аднолькава добра былі падабраны і выкананы песні, танцы, кампазіцыя на флейце і скрыпцы, кранальныя дыялогі вядучых.
Зрэшты, гэта не толькі маё асабістае меркаванне: пасля канцэрта да мяне падышлі шматдзетная мама Святлана і шматдзетная бабуля Людміла і папрасілі падзякаваць праз газету за такі цудоўны канцэрт для мам. Вось я і дзякую: і тым, хто ў ім удзельнічаў, і тым, хто яго паглядзеў, ацаніў і падзякаваў.
Т. ЛУКАШЭВІЧ
Фота аўтара
Больш фота па спасылцы