Дзесяць маніторынгавых груп па абследаванні гандлёвых аб’ектаў, месцаў на рынках, аўтамагазінаў, аб’ектаў бытавога абслугоўвання і сацыяльнай сферы, якія аказваюць платныя паслугі насельніцтву, створаны ў Глускім раёне.

Гэта работа праводзіцца ў рамках выканання Дырэктывы № 10 ад 6 кастрычніка “Аб недапушчальнасці росту цэн”. У складзе груп — сем работнікаў выканаўчага камітэта, чатырнаццаць дэпутатаў раённага Савета, прадстаўнікі прафсаюзаў і грамадскага аб’яднання БРСМ. У Глускім раёне маніторынгу падлягаюць 184 аб’екты, абследаваны ўжо 96. Фактаў павышэння цэн на тавары і паслугі маніторынгавымі групамі не выяўлена, не паступіла зваротаў грамадзян і на прамую лінію, што працавала ў райвыканкаме 8 і 9 кастрычніка, паведаміла рэдакцыі раённай газеты намеснік старшыні райвыканкама Людміла Васіленка. Яна таксама расказала, што 6 кастрычніка ў райвыканкаме была праведзена нарада з прадстаўнікамі гандлю, дзе ім растлумачылі асноўныя палажэнні прынятага дакумента, папярэдзілі аб недапушчальнасці павышэння цэн, аб крымінальнай адказнасці за невыкананне патрабаванняў Дырэктывы. Яе палажэнні тычацца таксама сферы аўтамабільных перавозак, паслуг таксі, устаноў грамадскага харчавання. Зараз у аддзеле эканомікі райвыканкама  працуе гарачая тэлефонная лінія (78-8-97, 78-9-98, 78-9-95), куды грамадзяне могуць пазваніць і паведаміць пра факты павышэння цэн на тавары і паслугі, калі такія выпадкі будуць выяўлены. Маніторынг аб’ектаў прадаўжаецца.