Праз навагодняе ўпрыгажэнне надаць аб’ектам сацыяльна-культурнага і вытворчага прызначэння раёна мастацкую выразнасць, актывізаваць работы па добраўпарадкаванні і належным утрыманні тэрыторый. Такія мэты ставіць раённы выканаўчы камітэт, арганізоўваючы штогадовы агляд-конкурс на лепшае навагодняе афармленне сярод мясцовых прадпрыемстваў, арганізацый і ўстаноў усіх формаў уласнасці. Згодна з адпаведным распараджэннем упрыгажэнне адміністрацыйных будынкаў і тэрыторый патрэбна завяршыць да 10 снежня.
Асобным распараджэннем створана і камісія па падвядзенні вынікаў гэтага агляду-конкурсу, яе ўзначаліў намеснік старшыні райвыканкама Аляксандр Анцюшэня. Камісія будзе працаваць дзесяць дзён, пачынаючы з 20 снежня, 30 чысла вынікі конкурсу павінны быць падведзены. Пры вызначэнні пераможцаў будзе ўлічвацца арыгінальнасць ідэі, ілюмінацыя аб’ектаў, якасць выкананых работ і стан прылягаючых тэрыторый, тое, як прыдуманае і зробленае афармленне глядзіцца ў комплексе.
Пераможцы конкурсу будуць вызначацца асобна сярод аб’ектаў, размешчаных у Глуску, і сярод тых, што знаходзяцца ў сельскай мясцовасці. І ў той, і ў другой намінацыі прадугледжаны прэміі.
Як па мне, дык пастарацца трэба не для пахвалы і ўзнагароды, а для таго, каб наш гарадскі пасёлак і вясковыя вуліцы таксама выглядалі прыгожа, святочна, па-навагодняму радасна. Каб зімовым вечарам хацелася не сядзець на канапе, а прайсціся па вуліцах, паглядзець, палюбавацца, ацаніць хараство, узняць настрой. Зрэшты, так яно і бывае звычайна, сяголета таксама будзем спадзявацца на гэта.
Т. ЛУГАВАЯ
