Падзяка за святочны настрой. Падведзены вынікі конкурсу на лепшае навагодняе афармленне будынкаў Глуска
Падведзены вынікі, мабыць, самага прыгожага, самага святочнага і самага масавага раённага агляду-конкурсу — на лепшае навагодняе афармленне. У ім прымалі ўдзел ці не ўсе прадпрыемствы, установы і арганізацыі Глускага раёна. На мінулым тыдні падчас рабочай нарады ў райвыканкаме Уладзімір Кніга падзякаваў усім удзельнікам конкурсу, што пастараліся ўпрыгожыць будынкі і тэрыторыі, адзначыў добрую навагоднюю падрыхтоўку Глускага філіяла “Бабушкінай крынкі”, Глускага лясгаса, аддзела па надзвычайных сітуацыях, ясляў-сада № 3, СШ № 2, УКП “Жылкамгас”, раённай бальніцы.
Што да пераможцаў, то сяголета найбольшую колькасць балаў, 45, набрала Дзіцячая школа мастацтваў імя Валерыя Іванова і заняла першае месца. Там не проста прыгожа развесілі агеньчыкі па вокнах, а на сваёй кампактнай тэрыторыі стварылі сапраўдны святочны навагодні куток — з блішчустымі санкамі, незвычайнымі елачкамі, зіхатлівымі шарамі і падарункамі. Другое месца падзялілі раённае спажывецкае таварыства і раённы цэнтр сацыяльнага абслугоўвання насельніцтва, яны набралі па 43 балы. Хто праходзіў міма гэтых тэрыторый, той, напэўна, звярнуў увагу на сапраўды цікавае, шчодрае і разнастайнае іх афармленне. Таксама дзвюм установам прысуджана трэцяе месца, гэта гімназія Глуска і дзіцячы сад № 4 (па 42 балы), творчы падыход, з густам і фантазіяй, тут праяўляюць заўсёды. Кіраўнікам названых устаноў Уладзімір Кніга ўручыў заслужаныя дыпломы і прэміі.
Які-які, а гэты агляд-конкурс, на маю думку, патрэбен абавязкова. І галоўнае слова тут не конкурс, а агляд, бо ўся гэта прыгажосць ствараецца не дзеля прэмій (яны, дарэчы, не пакрываюць і малой часткі выдаткаў, асабліва калі на адно месца два прызёры). Дзякуючы агульным намаганням, усім гэтым агеньчыкам, гірляндам, фігуркам у людзей узнікае насамрэч святочны настрой, вуліцы цёмнай парой становяцца больш вясёлымі і прывабнымі. Хочацца прайсціся, прагуляцца, паглядзець, палюбавацца, падзівіцца, што ў каго ды як. Дарэчы, не адстаюць і гаспадары домаўладанняў, з кожным годам стараюцца ўсё больш цікава і прыгожа прыбраць свае дамы і двары, адмыслова іх асвятліць да свята. Ведаю, што многія местачкоўцы перад Новым годам ладзяць абыходы, аб’езды вуліц і іншых грамадскіх месцаў, ствараюць свае рэйтынгі лепшых. Словам, патрэбны конкурс, добрая справа, вуліцам — прыгажосць, а людзям — настрой.
Таццяна ЛУКАШЭВІЧ
Фота Ірыны ГРАМЫКІ