Сярод медработнікаў, адзначаных на выніковым сходзе ў раённай бальніцы ўзнагародамі рознага ўзроўню, — урач-педыятр Ірына Леанідаўна Сіманава. “За шматгадовую плённую працу, высокі прафесіяналізм, дасягнутыя працоўныя поспехі ў 2022 годзе”, — так напісана ў Ганаровай грамаце галоўнага ўпраўлення па ахове здароўя Магілёўскага аблвыканкама і Магілёўскай абласной арганізацыі Беларускага прафсаюза работнікаў аховы здароўя, якая пад апладысменты калег была ўручана Ірыне Леанідаўне.
Напісанае ў гэтай грамаце не агульныя словы, не дзяжурныя фразы — яны цалкам абгрунтаваныя і напоўненыя сэнсам, таму што напоўнены і падмацаваны насамрэч доўгай, стараннай і вельмі няпростай працай дзіцячага ўрача. У нашай раённай бальніцы з маленькімі пацыентамі яна працуе 40 гадоў, з 1980-га, тры гады прысвяціла хворым выхаванцам Веснаўскага дома-інтэрната. І зразумела, што гэта Ганаровая грамата не першая і не адзіная ўзнагарода Ірыны Сіманавай, двойчы яна прызнавалася пераможцам раённага спаборніцтва сярод работнікаў вядучых прафесій і станавілася ўрачом года (апошні раз — за 2017 год).
Зараз, вось ужо два гады, працуе ўрачом-педыятрам у санаторнай школе-інтэрнаце, пад яе медыцынскім наглядам 110 дзяцей. Па словах кіраўніка ўстановы Святланы Лісіцы, Ірына Леанідаўна не толькі займаецца дзецьмі, але і плённа ўзаемадзейнічае з адміністрацыяй, дае парады па арганізацыі вучэбнага працэсу, аздараўлення навучэнцаў. “Добры доктар, адчуваецца, што любіць дзяцей”, — падсумавала дырэктар школы. Ёмкая і трапная характарыстыка.
Не так даўно Ірына Леанідаўна адзначыла свой чарговы дзень нараджэння. Далучаемся да тых добрых слоў і шчырых пажаданняў, што прагучалі ў яе адрас ад родных, сяброў, калег. Хай іх побач з ёй заўсёды будзе шмат — і добрых слоў, і добрых людзей.
Т. ЛУГАВАЯ
Фота аўтара
