Сімвалы, якія аб’ядноўваюць
Чатырнаццатага мая ў нашай краіне адзначалася свята — Дзень Дзяржаўнага флага, Дзяржаўнага герба і Дзяржаўнага гімна Рэспублікі Беларусь. З гэтай нагоды ў Глуску прайшло тэматычнае мерапрыемства, удзельнікамі якога сталі актывісты піянерскай арганізацыі і Беларускага рэспубліканскага саюза моладзі. Гутарку з імі правяла галоўны спецыяліст аддзела ідэалагічнай работы і па справах моладзі Таццяна Мельнікава. Атрымаўся сапраўдны ўрок, на якім школьнікам нагадалі пра сімвалы нашай дзяржавы, якія адлюстроўваюць міралюбства, працавітасць і гасціннасць беларусаў, павагу да продкаў і свайго мінулага, непарушнасць і цэласнасць тэрыторыі нашай краіны.
Падлеткі не толькі разам выканалі гімн, але і прынеслі ўрачыстую клятву вернасці дзяржаўным сімвалам Беларусі. Вось яе словы: “Мы, прадстаўнікі маладога пакалення, якое выхавана ў традыцыях павагі да гераічнага мінулага і подзвігаў продкаў, якое думкамі, пачуццямі і справамі даказвае вернасць Бацькаўшчыне, якое з гонарам бярэ на сябе адказнасць за будучыню Беларусі, клянёмся ў вернасці Дзяржаўнаму флагу, Дзяржаўнаму гербу і Дзяржаўнаму гімну Рэспублікі Беларусь і нашай Радзіме, якую яны сімвалізуюць. Клянёмся быць годнымі грамадзянамі Рэспублікі Беларусь, захоўваць мір і згоду на беларускай зямлі і, калі спатрэбіцца, абараняць яе гэтак жа годна і самааддана, як і нашы прадзеды ў гады Вялікай Айчыннай вайны. Клянёмся назаўжды захаваць словы гэтай свяшчэннай клятвы ў сэрцы, усё жыццё быць сапраўднымі патрыётамі Беларусі, перадаць любоў да Радзімы сваім нашчадкам!”
Гэта былі асабліва ўрачыстыя моманты сустрэчы, лагічнай кропкай якой стаў агульны фотаздымак моладзі з беларускімі флагамі.
Т. ЛУКАШЭВІЧ
Фота аўтара