У Беларусі неабходна наладзіць сувязь паміж сярэднімі спецыяльнымі і прафесійна-тэхнічнымі навучальнымі ўстановамі і наймальнікамі. Аб гэтым заявіла 2 чэрвеня журналістам намеснік прэм’ер-міністра Наталля Качанава на семінары “Аб узаемадзеянні прадпрыемстваў гарадской гаспадаркі і МДПТК будаўніцтва і камунальнай гаспадаркі па падрыхтоўцы кваліфікаваных рабочых кадраў”.

“Цяпер у Беларусі дзейнічае даволі зладжаная сістэма падрыхтоўкі кадраў. Ёсць толькі пытанне, што пакуль няма цеснай сувязі ў наймальніка і навучальнай установы. Калі будзе ўзаемная цікавасць, безумоўна, будзе і вынік”, — адзначыла Наталля Качанава.

Таксама віцэ-прэм’ер канстатавала неабходнасць перагляду падрыхтоўкі спецыялістаў рабочых прафесій у цэлым у краіне. Паводле слоў Наталлі Качанавай, пакуль ёсць сітуацыі, калі навучальныя ўстановы дубліруюць спецыяльнасці. Цяпер вядзецца работа па аптымізацыі. “Трэба мець выразнае ўяўленне аб тым, якія сёння прафесіі і спецыяльнасці запатрабаваны ў эканоміцы Беларусі, у кожным канкрэтным рэгіёне, на кожным канкрэтным прадпрыемстве”, — падкрэсліла Наталля Качанава.

Віцэ-прэм’ер акцэнтавала ўвагу на тым, што прафесійна-тэхнічныя навучальныя ўстановы павінны выпускаць спецыялістаў з максімальна высокім разрадам. “Нядобра, што мы выпускаем у асноўным спецыялістаў з 3 разрадам. Ад гэтага (разраду. — Заўвага БЕЛТА) непасрэдна залежыць і месца працаўладкавання, і заработная плата. І наймальнікі гавораць аб тым, што ім патрэбны кваліфікаваныя кадры”, — канстатавала Наталля Качанава.