У Беларусі ў выхадныя будзе цёплае надвор’е, пройдуць кароткачасовыя дажджы, паведаміла галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Святлана Рыбакова.

“Красавік у гэтым годзе шчодры на сюрпрызы. У першы дзень месяца месцамі яшчэ ішоў снег, а на гэтым тыдні ў Беларусь прыйшла анамальная цеплыня. І ўчора днём было амаль летняе надвор’е, максімальныя тэмпературы дасягнулі адзнак плюс 18-26 градусаў, у многіх раёнах прайшлі навальнічныя дажджы”, – адзначыла Святлана Рыбакова. Паводле яе слоў, у бліжэйшыя дні захаваецца няўстойлівае і вельмі цёплае надвор’е.

У пятніцу, 8 красавіка, Беларусь будзе пад уплывам франтальных раздзелаў, якія перамяшчаюцца з паўднёвага захаду Еўропы. Ноччу па Брэсцкай і Гродзенскай абласцях, днём на большай частцы тэрыторыі рэспублікі пройдуць кароткачасовыя дажджы рознай інтэнсіўнасці, месцамі прагрымяць навальніцы. Ноччу і раніцай у асобных раёнах згусцяцца непрацяглыя туманы. Тэмпература паветра ноччу – плюс 4-9 градусаў, па паўднёвым захадзе – да плюс 12; днём будзе ад 15 да 21 цяпла, у паўднёва-ўсходніх раёнах месцамі паветра прагрэецца да 27 градусаў. І толькі па паўночным захадзе ў час дажджоў месцамі тэмпература не ўзнімецца вышэй за 14 градусаў.

“У выхадныя дні паўночна-заходнія раёны краіны будуць знаходзіцца пад уплывам франтальных раздзелаў, на астатняй тэрыторыі рэспублікі надвор’е будзе вызначаць няўстойлівая і вельмі цёплая паветраная маса, якая паступае з паўднёвага захаду Еўропы”, – расказала Святлана Рыбакова.

У суботу, 9 красавіка, ноччу на большай частцы тэрыторыі, днём месцамі, у асноўным па паўночным захадзе, пройдуць кароткачасовыя дажджы, у асобных раёнах – з навальніцамі. Тэмпература паветра ноччу – плюс 6-13, днём – ад 17 да 23, па паўднёвым усходзе – да 25 цяпла, у паўночна-заходніх раёнах – плюс 10-16 градусаў.

У нядзелю, 10 красавіка, ноччу месцамі, днём на большай частцы тэрыторыі рэспублікі чакаюцца кароткачасовыя дажджы. У асобных раёнах прагрымяць навальніцы. Тэмпература паветра ноччу – плюс 7-13, днём – ад 17 да 23 цяпла, па паўднёвым усходзе – да плюс 25, па захадзе – 10-16 вышэй за нуль.

“У пачатку наступнага тыдня надвор’е ў краіне будуць вызначаць атмасферныя франты, за якімі пачне паступаць умерана цёплая паветраная маса з боку Заходняй Еўропы. Тэмпературны фон крыху панізіцца, але тым не менш ён па-ранейшаму будзе вышэйшым за кліматычную норму”, – растлумачыла Святлана Рыбакова.

У панядзелак і аўторак, 11 і 12 красавіка, ноччу месцамі, днём на большай частцы тэрыторыі пройдуць кароткачасовыя дажджы. У асобных раёнах прагрымяць навальніцы. Тэмпература паветра ноччу – плюс 5-12, днём будзе 10-17 вышэй за нуль, па ўсходзе паветра прагрэецца да плюс 21 градуса.