Місія настаўніка — быць для ўсіх прыкладам. Такое меркаванне выказаў у час анлайн-канферэнцыі на тэму «Роля настаўніка ў сучасным грамадстве» на сайце БЕЛТА міністр адукацыі Міхаіл Жураўкоў.

«Я даволі шмат наведваю школы, асабліва ў маленькіх раённых цэнтрах і вёсках, і мне падабаецца, што трапяткое стаўленне да настаўніка там засталося. Літаральна ў пятніцу быў у невялікай школе ў Пінскім раёне і размаўляў з настаўнікамі. Яны мне самі кажуць: «У нас такая місія — быць прыкладам у вёсцы для ўсяго насельніцтва». І кажуць гэта з гордасцю. Я спадзяюся, што ўсе настаўнікі гэта разумеюць і стараюцца гэтага прытрымлівацца», — адзначыў міністр адукацыі.

Акрамя таго, Міхаіл Жураўкоў падкрэсліў, што настаўнік не проста дае веды, але яшчэ і выхоўвае. «Адукацыя без выхавання немагчыма, іх нельга раздзяліць», — рэзюмаваў ён.

Паводле слоў міністра, колькасны склад педагогаў дашкольных устаноў сёння складае больш як 54 тыс. чалавек, агульнаадукацыйных — амаль 97,8 тыс., прафесійна-тэхнічнай адукацыі — 11,9 тыс., сярэдняй спецыяльнай адукацыі — 9,2 тыс. Колькасць прафесарска-выкладчыцкіх кадраў у падведамных Міністэрству адукацыі вышэйшых навучальных установах — 15,2 тыс. чалавек. «Што датычыцца іх кваліфікацыі і адукацыі, то ў дашкольных установах колькасць педагогаў з вышэйшай адукацыяй — 56,9 працэнта. У школах, гімназіях, ліцэях вышэйшую адукацыю маюць 92,8 працэнта работнікаў, вышэйшую кваліфікацыйную катэгорыю — 17,8 працэнта, першую — 35 працэнтаў. Якасна палепшылася і прафесійна-педагагічная структура ўстаноў прафесійна-тэхнічнай адукацыі. Вышэйшую адукацыю маюць 98 працэнтаў выкладчыкаў, 84,3 працэнта — кваліфікацыйныя катэгорыі», — адзначыў ён.

У 2015 годзе ў вышэйшых навучальных установах, падведамных Міністэрству адукацыі, працуюць 900 дактароў навук, 5,7 тыс. кандыдатаў навук, вучонае званне прафесара маюць амаль 800 чалавек, дацэнта — больш як 4,8 тыс. чалавек.