У пачатку снежня наша газета пісала, што пачаўся капітальны рамонт гарпасялковай гімназіі. Ён праводзіўся паралельна з навучальным працэсам, і другую чвэрць гімназісты закончылі ў родных сценах. Пасля канікул, з восьмага студзеня, яны пачалі займацца ў іншых навучальных установах, расказала рэдакцыі начальнік аддзела па адукацыі, спорце і турызме Святлана Лісіца. Вучняў першых класаў прыняў дзіцячы садок № 4. Другакласнікі “прапісаліся” ў Калаціцкім дзіцячым садку, туды іх будуць вазіць на аўтобусе. Будуць падвозіць, толькі ў сярэднюю школу № 1, і вучняў трэціх, чацвёртых класаў, яны будуць займацца ў першую змену. А вось для 205 старэйшых дзяцей, з 5-х па 11-я класы, навучальны працэс арганізаваны ў другую змену ў сярэдняй школе № 2. Настаўнікі спадзяюцца, што вучні і іх бацькі паставяцца з паразуменнем да гэтых часовых цяжкасцей, затое вернуцца ў прыгожыя адрамантаваныя класы.

Капітальны рамонт гімназіі праводзіцца згодна з праектам “Мадэрнізацыя сістэмы адукацыі Рэспублікі Беларусь”. Праект гэты рэалізуецца Міністэрствам адукацыі пры фінансавай падтрымцы Сусветнага банка рэканструкцыі і развіцця.

Мы пабывалі ў гімназіі, каб на свае вочы пабачыць, як праходзіць рамонт. Зараз у памяшканні гімназіі мяняюць падлогі ў класах, тынкуюць сцены, ставяць новыя вокны, неўзабаве, як толькі палепшае надвор’е, павінны пачаць накрываць дах, растлумачыла нам начальнік аддзела па адукацыі. Генеральная падрадная арганізацыя, якая выйграла тэндар на правядзенне рамонту, — фірма “Кристмас Плюс”. Акрамя рамонту, паведаміла Святлана Лісіца, на выдзеленыя Сусветным банкам сродкі будзе закуплена сучаснае абсталяванне для кабінетаў хіміі, біялогіі, інфарматыкі.

А. ВАСІЛЕЎСКАЯ

Фота аўтара