“Тапонімы вёскі Зелянковічы”, “Богоявленский глусский приход”, “Усадьба Жилинских”, “Птичь”, “Улицы моего города” — гэтыя і іншыя цікавыя тэмы выбралі школьнікі Глускага раёна для ўдзелу ў абласным праекце “#Мая_Зямля_Прыдняпроўе”. Раённы форум актывістаў гэтага маштабнага праекта адбыўся 8 красавіка ў сярэдняй школе № 1 імя С. І. Грахоўскага.

Напачатку гасцей запрасілі ў фае, дзе часова размясцілася экспазіцыя, прысвечаная школе і, бадай што, самаму вядомаму яе  выпускніку — Сяргею Іванавічу Грахоўскаму. Тут знайшлі сваё месца асабістыя рэчы паэта, фотаздымкі, аўтографы, якія пакінулі школе славутыя госці.

Старшакласнікі добра падрыхтаваліся да мерапрыемства. Яны расказалі прысутным, што ў гэтым навучальным годзе тут рэалізуюць праект “Яго іменем названа школа мая”, прысвечаны Сяргею Грахоўскаму. Вядучыя нагадалі гасцям біяграфію паэта, чыталі яго вершы, іх расказ суправаджаўся на вялікім экране фатаграфіямі і відэазапісамі.

Працягнулася імпрэза ў актавай зале. “#Мая_Зямля_Прыдняпроўе” — сапраўды маштабны праект, ён доўжыцца не першы год, падзелены на тры этапы, і два з іх ужо рэалізаваны. Першы этап — конкурс “Вандроўка ў мінулае” — завяршыўся ў маі 2021 года, пра яго ўдзельнікам форуму расказала метадыст раённага вучэбна-метадычнага кабінета Юлія Сідарава. Конкурс “Вандроўка ў мінулае” ставіў сваёй мэтай даследаванне гісторыка-культурных і прыродных помнікаў пэўнага рэгіёна, адраджэнне культурных традыцый, стварэнне экскурсійных маршрутаў, промапрадукцыі і ўключаў дзве намінацыі: “Мой родны кут…” і “Тапонімы побач”.

Узнагародзіць прызёраў запрасілі галоўнага спецыяліста раённага аддзела па адукацыі, спорце і турызме Юлію Фралову. У намінацыі “Родны кут” дыпломам 3-й ступені адзначана Кацярына Касько, Каткаўскі НПК, за работу “Край мой Прыдняпроўе”. Дыпломы 2-й ступені атрымалі вучні Заеліцкай школы Павел Штылёў і Вольга Цагельнік за работу “Памятники и воинские захоронения на территории Славковичского сельсовета”, вучань Завалочыцкай школы Дзмітрый Дзяшчэня за работу “Дорогами истории, дорогами славы”, а таксама Ганна Леанідаўна Януш, на той час намеснік дырэктара Цэнтра творчасці Глуска. Дыпломамі 1-й ступені ўзнагароджана творчая група навучэнцаў сярэдняй школы № 1, педагогі Валянціна Георгіеўна Долбік і Вольга Генадзьеўна Гааг за работу “Мой родной Глуск”.

У намінацыі “Тапонімы побач” дыпломам 3-й ступені адзначана Руслана Лоска з Каткаўскай школы, дыплома 2-й ступені — Максім Гаравікоў, Заеліцкі НПК, за работу “Особенности формирования ойконимов Славковщины”. Дыпломы 1-й ступені атрымалі Юлія Лапцева і Анастасія Долбік з Усцярхоўскага НПК за работу “Тапонімы вёскі Зелянковічы”.

Акрамя гэтага, за актыўны ўдзел у праекце “#Мая_Зямля_Прыдняпроўе” дыпломамі адзначаны педагог-арганізатар Глускай санаторнай школы-інтэрната Валянціна Іванаўна Хлань, а таксама педкалектывы ясляў-сада № 1, № 3 і № 4 Глуска. Педагогі дашкольнай адукацыі бралі ўдзел у намінацыі “Родны кут вачыма дзіцяці…”, стваралі інтэрактыўныя карты Глускага раёна, здымалі відэаролікі, дзяліліся сваімі напрацоўкамі ў абласной панараме вопыту работы “Сваёй зямлёй я вельмі ганаруся”, у абласным фестывалі адукацыйных праектаў “Прошлое и настоящее моего города (района, поселка)”.

У верасні 2021 года пачаў свой адлік другі этап праекта — “Раён адчыняе дзверы”, з гэтага часу і па снежань на Глушчыне праходзіў конкурс “Тут Радзімы маёй пачатак”. На конкурс было даслана больш за 40 работ, расказала намеснік дырэктара Цэнтра творчасці па вучэбна-выхаваўчай рабоце Людміла Васілеўская. Школьнікі актыўна ўдзельнічалі ў экскурсіях, майстар-класах, музейна-педагагічных занятках, і іх уражанні і новыя веды знайшлі сваё адлюстраванне ў конкурсных работах. Між іншым, умовы намінацый былі даволі цікавыя. Напрыклад, для “Музейнай старонкі” трэба было наведаць школьныя і раённы музей, Дом рамёстваў, вызначыць для сябе тую рэч, якая з’яўляецца візітоўкай кожнай установы, і расказаць пра гэту рэч. Спартры (асінавая стружка і палатно з яе), варган (старажытны музычны інструмент), рабінка, прывезеная з тых мясцін, дзе ў Вялікую Айчынную змагаўся наш зямляк капітан Юневіч, ручнікі, калекцыя прасаў — на гэтыя і іншыя прадметы звярнулі сваю ўвагу школьнікі.

Узнагароды па выніках другога этапу праекта “#Мая_Зямля_Прыдняпроўе” атрымалі наступныя вучні.

У намінацыі “Музейная старонка” дыпломам 3-й ступені адзначаны Таццяна Крупская з Клятнянскага НПК і Ягор Равінскі, гімназія. Дыпломы 2-й ступені прысуджаны выхаванцы Цэнтра творчасці Дар’і Чорнай і вучаніцы Заеліцкай школы Лізавеце Лук’янчук. Дыпломамі 1-й ступені ўзнагароджаны Марыя Хацяновіч, СШ № 1, і Эмілія Дзярбеева з Цэнтра творчасці.

Дыпломам 3-й ступені ў намінацыі “Копилка путешественника” адзначаны Міхаіл Трыбуш, СШ № 2, за буклет “Богоявленский глусский приход”, дыпломам 2-й ступені — Юлія Лапцева, Усцярхоўская школа, работа “Па малой Радзіме”. Дыплом 1-й ступені ў гэтай намінацыі дастаўся Дзмітрыю Дзяшчэню, навучэнцу Цэнтра творчасці, за работу “Завалочыцкі край”.

У намінацыі “Край родной, я тебя воспеваю” 3-е месца атрымала аднайменная работа вучня СШ № 2 Дзмітрыя Байко, 2-е месца — у Дар’і Урбанскай з СШ № 1, работа “Птичь”. Дыпломам 1-й ступені ўзнагароджаны вучні 5-га класа Завалочыцкай школы, якія стварылі праект “Усадьба Жилинских”.

І, нарэшце, у намінацыі “Челлендж #Улица моего города” дыплом 3-й ступені ўручылі Алене Гааг, вучаніцы СШ № 1, за работу “Улицы моего города”, дыплом 2-й ступені — навучэнцам Завалочыцкай школы за відэарэпартаж, прысвечаны Герою Савецкага Саюза  Ульяну Рыбаку, імя якога носіць адна з вуліц аграгарадка Завалочыцы. Першае месца ў гэтай намінацыі атрымала група вучняў СШ № 2, якія ў сваім праекце расказалі пра герояў і знакамітых людзей, у гонар якіх названы вуліцы Глуска.

Два этапы праекта “#Мая_Зямля_Прыдняпроўе” завяршыліся, наперадзе — яшчэ адзін, не менш цікавы: школьнікі будуць афармляць падарожныя дзённікі, ладзіць краязнаўчыя квесты, здымаць экскурсійныя відэаролікі і выконваць іншыя творчыя заданні. Зазначу, што і форум  актывістаў праекта атрымаўся не сухі, быццам справаздача, а таксама творчы, насычаны эмоцыямі, гучалі песні і вершы, быў нават флешмоб… Дзякуй за гэта арганізатарам, школьнікам-вядучым і ўсім, хто падтрымаў гэты форум на ўзроўні ідэі, слова, справы.

А. ВАСІЛЕЎСКАЯ, фота аўтара