За мінулы год для аздараўлення ў санаторыях жыхарам Глускага раёна было размеркавана 97 пуцёвак.

З іх за кошт сродкаў рэспубліканскага бюджэту выдзелена 21 пуцёўка. Бясплатна іх атрымалі дзіця з інваліднасцю і дарослыя з інваліднасцю 1-й групы (пуцёўкі выдаваліся ім і асобам для іх суправаджэння), яшчэ дзесяць бясплатных пуцёвак атрымалі людзі з інваліднасцю 2-й групы. Усяго такіх пуцёвак было 16. Пяць чалавек прайшлі аздараўленне з частковай аплатай, гэта непрацуючы пенсіянер сілавых структур і чатыры ветэраны працы. Даплата за пуцёўку складала ад 490 да 850 тысяч рублёў, гэта 15 — 20 працэнтаў ад поўнага яе кошту. 

За кошт сродкаў дзяржаўнага сацыяльнага страхавання ў мінулым годзе было атрымана 76 пуцёвак, па якіх адпачылі і прайшлі аздараўленне 78 чалавек. Большасць — гэта дзеці, якія па 45 бясплатных пуцёўках адпачывалі ў дзіцячых санаторыях.

— Нашы дзеткі папраўлялі сваё здароўе ў розных санаторыях, у залежнасці ад узросту дзіцяці і профілю здраўніцы, —  расказвае галоўны спецыяліст Магілёўскага прадстаўніцтва па аздараўленні і санаторна-курортным лячэнні насельніцтва Глускага раёна Марына Сушчэня. — Скажам, школьнікі — у “Налібоцкай пушчы” і “Свіслачы” (сістэма кровазвароту, органы дыхання, стрававання, скуры і падскурнай клятчаткі), дзяцей дашкольнага ўзросту (ад 3 да 6 гадоў) і малодшых школьнікаў накіроўвалі ў “Радугу” (апорна-рухальны апарат, алергічныя захворванні, органы дыхання). Ездзілі таксама ў дзіцячае аддзяленне санаторыя “Беларусь”, што ў Літве, горад Друскінінкай, там лечаць органы стрававання і апорна-рухальны апарат. Для бацькоў з дзецьмі на ўмовах частковай аплаты было выдзелена 14 пуцёвак і толькі 17 — у санаторыі для дарослых. Даплачваць, у залежнасці ад даходаў адпачываючых, трэба было ад 790 тысяч да 2 мільёнаў 150 тысяч рублёў (15 — 40 працэнтаў).

Атрыманы і размеркаваны ўжо і пуцёўкі на 1-ы квартал 2015 года. За кошт сродкаў рэспубліканскага бюджэту іх атрымана дзевяць. З частковай аплатай 15 — 20 працэнтаў пуцёўкі выдзелены непрацуючаму пенсіянеру сілавых структур (1 пуцёўка), а таксама інвалідам 2-й групы і непрацуючым ветэранам працы (6 пуцёвак). Дзве бясплатныя пуцёўкі выдзелены для дзіцяці з інваліднасцю і асобы для яго суправаджэння. Атрыманы пуцёўкі ў дзіцячыя санаторыі і за кошт сродкаў дзяржаўнага сацыяльнага страхавання — 14, яны таксама бясплатныя, а санаторыі — даволі блізкія да нас: у Магілёве, Бабруйску, Асіповічах. Чатыры пуцёўкі з частковай аплатай вы-дзелены для бацькоў з дзецьмі і шэсць — у санаторыі для дарослых. Яны размеркаваны па адной на аддзел адукацыі, спорту і турызму, раённую бальніцу, ДРБУ-213, раённае спажывецкае таварыства, Хваставіцкі сельвыканкам і аддзел ідэалагічнай работы, культуры і па справах моладзі.

Працэдура пастаноўкі на чаргу для атрымання пуцёвак для працуючых тая ж, што і раней, — з адпаведнай заявай звяртацца па месцы работы ў камісію па аздараўленні.

Т. ЛУГАВАЯ