Ва ўсе часы менавіта людзі праслаўлялі сваёй працай і дасягненнямі тыя мясціны, дзе яны жылі. За амаль стагадовую гісторыю Глускага раёна такіх працавітых землякоў у нас было шмат. Але  з часам іх імёны, на жаль, згубіліся. Каб выправіць такую крыўдную недарэчнасць і каб цяперашняе пакаленне ведала нашых герояў-працаўнікоў, раённым саветам ветэранаў (па ініцыятыве абласнога савета ветэранаў) была створана “Кніга працоўнай славы Глускага раёна”.

На працягу года па крупінках збіралася інфармацыя аб глушчанах, адзначаных за ўдарную працу і дасягненні высокімі ўрадавымі ўзнагародамі: ордэнамі і медалямі. Як расказала старшыня раённага савета ветэранаў Тамара Толсцік, звесткі пра кожнага чалавека збіралі з максімальнай колькасці крыніц. У пошуках дапамагалі ў першую чаргу мясцовыя прадпрыемствы і арганізацыі. Таксама бралі даныя з энцыклапедыі “Кто есть кто в Республике Беларусь”. Родныя некаторых герояў-працаўнікоў, хоць, на жаль, і ў меншай ступені, таксама паўдзельнічалі ў стварэнні кнігі. У выніку матэрыялаў назбіраўся вялікі стос — “дасье” аж на 200 чалавек. “Сістэматызаваць і аформіць сабраную інфармацыю, — расказала Тамара Сямёнаўна, — нам дапамаглі супрацоўнікі раённай бібліятэкі, за што ім вялікі дзякуй”.

У “Кнізе працоўнай славы Глускага раёна” 123 старонкі. Там ёсць звесткі пра кіраўнікоў нашага раёна, ганаровых грамадзян, Герояў Сацыялістычнай Працы, пра глушчан, якія былі ўдастоены звання “Заслужаны”, а таксама пра землякоў,  узнагароджаных працоўнымі ордэнамі, медалямі. Сама кніга пакуль што існуе толькі ў двух экзэмплярах: адзін знаходзіцца ў раённым савеце ветэранаў, а другі — у Магілёве, у абласным савеце.

Безумоўна, кніга ахапіла толькі частку з вялікай колькасці нашых працавітых і заслужаных землякоў, і інфармацыя збіраецца далей. Таму старшыня раённага савета ветэранаў Тамара Толсцік звяртаецца з просьбай да ўсіх глушчан, у каго ёсць звесткі пра іх родных, адзначаных высокімі працоўнымі ўзнагародамі, а таксама дакументы, пасведчанні, граматы і іншае, прыносіць іх у раённы савет ветэранаў і расказаць, што ведаеце пра сваіх родзічаў. Каб пра гэтых працавітых людзей дазналіся ўсе жыхары нашага раёна.  

Вольга ЯНУШЭЎСКАЯ