У Дзень Кастрычніцкай рэвалюцыі ў Глуску прайшло ўрачыстае ўскладанне кветак да бюста двойчы Героя Савецкага Саюза Сцяпана Шутава і да памятных знакаў у гонар нашых землякоў-Герояў, там жа была арганізавана Вахта памяці. У шэсці, якое ўзначалілі старшыня раённага Савета дэпутатаў Андрэй Баброўнік і намеснік старшыні райвыканкама Дзмітрый Цімчанка, прынялі ўдзел кіраўнікі працоўных калектываў, грамадскіх арганізацый і аб’яднанняў.

Найбольш масавай была дэлегацыя прадстаўнікоў раённай арганізацыі Кампартыі Беларусі, якія і да гэтага часу засталіся вернымі ідэям Кастрычніка. Адметна, што іх падзяляюць не толькі камуністы, чый партыйны стаж бярэ пачатак у савецкія часы. Амаль штогод раённая арганізацыя папаўняецца новымі прыхільнікамі. На гэты раз у рады Камуністычнай партыі Беларусі быў прыняты Генадзь Ліпскі. Партыйны білет 7 лістапада на Алеі Славы яму ўручыў сакратар Глускай раённай арганізацыі КПБ Павел Еўпак. Такім чынам, цяпер колькасць гэтага партыйнага звяна складае 21 чалавек.

Што да іншых мерапрыемстваў, запланаваных на 7 лістапада ў Глуску, то яны таксама адбыліся, хаця з-за дажджу былі не надта масавымі. На кірмашы можна было купіць свежае і смачнае печыва, садавіну і агародніну, зерне, сала, мяса, грыбы, мёд, згуляць у бяспройгрышную латарэю. Адпачынак для душы знайшлі і тыя гарпасялкоўцы, хто пайшоў на канцэрт народнага вакальнага ансамбля “Крынічанька”. Добрыя песні і іх шчырае выкананне ўнеслі ў пахмурны дзень светлыя фарбы і добры настрой.

Т. ЛУГАВАЯ

Фота аўтара