Датацыя на пуцёўку ў спартыўна-аздараўленчыя лагеры ўпершыню ўводзіцца ў Беларусі
Упершыню ў Беларусі ўводзіцца асобная датацыя на пуцёўку ў спартыўна-аздараўленчыя лагеры, паведаміў на прэс-канферэнцыі дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі.
Датацыя на пуцёўку ў спартыўна-аздараўленчыя лагеры з кругласутачным знаходжаннем складзе Br1,8 млн (прагназуемы кошт пуцёўкі ў такі лагер на летні перыяд – больш як Br4 млн).
Генадзь Балбатоўскі падкрэсліў, што памеры датацый на пуцёўкі для дзяцей у лагеры на летніх канікулах у 2016 годзе павялічаны ў сярэднім на 14 працэнтаў. У цэлым на кампанію накіравана больш як Br345 млрд, з іх на падрыхтоўку лагераў да сезона – Br5,4 млрд (на 12 працэнтаў больш у параўнанні з мінулым годам).
Са сродкаў дзяржаўнага сацыяльнага страхавання на патанненне адной пуцёўкі ў аздараўленчыя лагеры з кругласутачным знаходжаннем накіравана Br1,6 млн (прагназуемы кошт пуцёўкі – Br3,8 млн), з дзённым знаходжаннем – Br660 тыс. (прагназуемы кошт пуцёўкі – больш як Br1 млн), у профільныя аздараўленчыя лагеры з кругласутачным знаходжаннем тэрмінам не менш як 9 дзён – Br680 тыс. (прагназуемы кошт пуцёўкі – Br910 тыс.), у лагеры працы і адпачынку з дзённым знаходжаннем – Br740 тыс. (прагназуемы кошт пуцёўкі – крыху больш як Br1 млн).
Даплата бацькоў, як і ў папярэднія гады, складзе не менш за 10 працэнтаў, падкрэсліў дырэктар цэнтра.