Якія пытанні хвалююць маладых бацькоў і што патрэбна, каб наш Глуск стаў яшчэ больш камфортным і прыязным для яго жыхароў, — пра гэта гаварылі на сустрэчы старшыні райвыканкама Аляксея Жураўлёва з маладымі сем’ямі, яна па традыцыі адбылася ў маі, у месяцы, калі беларусы святкуюць Дзень сям’і.

У гасцінным і ўтульным холе ЦКіВЧ “Арыён” 23 мая сабраліся дзевяць пар, рознага ўзросту і розных прафесій, з розным стажам сямейнага жыцця, шматдзетныя і пакуль што з адным дзіцём, а некаторыя і ў “чаканні”… Кожная пара са сваёй гісторыяй і сваім сакрэтам сямейнага шчасця, аднак жа ўсе аб’яднаныя жаданнем будаваць сваё жыццё разам і ў міры і згодзе гадаваць і выхоўваць дзяцей.

Дзеці, іх выхаванне, клопаты пра іх — гэта тэма была, бадай што, галоўнай на сустрэчы, і гэта цалкам натуральна. Шмат гаварылі пра дапамогу бацькам з боку дзяржавы. Паасобку, можа, і не заўважна, а калі скласці ўсё разам, ад самага нараджэння дзіцяці да яго паўналецця, то зразумела: падтрымка гэта даволі сур’ёзная, заўважыў старшыня райвыканкама Аляксей Жураўлёў. Дарэчы, сам шматдзетны бацька, шчаслівы бацька трох дачок, так што падзяліцца з маладымі Аляксею Анатольевічу ёсць чым, і са свайго асабістага вопыту, і з назіранняў за іншымі. Хаця б тым, што ў нейкі момант зразумеў: не важна, хто родзіцца, дзяўчынка ці хлопчык, — галоўнае, каб дзіця было здаровенькае. Ці вось яшчэ, быццам бы і жарт, але з доляй сур’ёзу: трэцяе і наступных дзяцей гадуюць не бацькі, а старэйшыя дзеці. І парада маладым бацькам: не перакладайце выхаванне дзяцей на садзік і школу, на гурткі і аб’яднанні — выхоўвайце сваіх дзяцей у першую чаргу самі.

Між іншым, гаварылі не толькі пра выхаванне і маральныя каштоўнасці. Абмяркоўвалі і надзённыя праблемы. На сустрэчы прысутнічалі начальнік аддзела ідэалагічнай работы і па справах моладзі Алена Самуйлік, начальнік аддзела ЗАГС райвыканкама Ганна Марціновіч, начальнік аддзела жыллёва-камунальнай гаспадаркі, архітэктуры і будаўніцтва Яўгенія Грыгор’ева, намеснік начальніка — начальнік аддзела пенсій і дапамог упраўлення па працы, занятасці і сацыяльнай абароне Кацярына Толсцік, і на некаторыя свае пытанні запрошаныя атрымалі адказы адразу, іншыя старшыня райвыканкама ўзяў на карандаш.

Вельмі добра, што ў Глуску і раёне з’яўляюцца новыя дзіцячыя пляцоўкі, заўважыла адна са шматдзетных маці і прапанавала: добра было б каля гэтых пляцовак паставіць папярэджанні пра забарону на выгул сабак і катоў. Бясхатняй жывёле, зразумела, гэтага не растлумачыш, але, на жаль, і некаторыя гаспадары пускаюць пагуляць сваіх гадаванцаў у дзіцячыя пясочніцы. Так, калі ў людзей хапае на гэта сумлення, то неабходна нагадваць ім пра элементарныя правілы паводзін і меры адказнасці за парушэнне правіл выгулу хатніх жывёл, згадзіўся Аляксей Жураўлёў.

Яшчэ адно пытанне, ад таты, тычылася стану школьных стадыёнаў: калі гаварыць пра стадыёны гімназіі і дзвюх школ райцэнтра, то параўнанне будзе не на карысць апошніх. Заўвага слушная, лічыць старшыня райвыканкама, ён паабяцаў звярнуць на гэта асаблівую ўвагу. Між іншым, апрача школьных, у Глуску маюцца іншыя спартыўныя пляцоўкі для ахвотных, і не адна, але попыт на здаровы лад жыцця павялічваецца, таму раённая ўлада задумваецца, каб павялічыць іх колькасць. Магчыма, калі дазволяць сродкі, новая спартыўная пляцоўка з сучасным абсталяваннем з’явіцца якраз на тэрыторыі абноўленага парка каля СШ № 2, сказаў Аляксей Жураўлёў.

Як атрымаць крэдыт на рэканструкцыю жылля, растлумачыла зацікаўленым начальнік аддзела ЖКГ, архітэктуры і будаўніцтва Яўгенія Грыгор’ева. Коратка алгарытм выглядае так: чалавек, які мае права на такі крэдыт і стаіць на ўліку тых, хто мае патрэбу ў паляпшэнні жыллёвых умоў, звяртаецца ў “адно акно” райвыканкама — атрымлівае дазвольныя дакументы на рэканструкцыю — распрацоўвае праектна-каштарысную дакументацыю — пачынае рэканструкцыю за свае сродкі (банк выдае крэдыт, калі яна выканана не меней як на 15 %) — звяртаецца ў “адно акно”, каб яго ўключылі ў спісы на атрыманне льготнага крэдыту — ідзе ў банк па крэдыт. Распрацаваць ПКД і пачаць рамонт можна, зразумела, зараней, пакуль будуць афармляцца дакументы ў “адным акне”, дарэчы, тэрмін іх афармлення адносна невялікі.

Яшчэ адно пытанне таксама датычылася жылля: ці плануецца будаваць у Глуску трохпакаёвыя арэндныя кватэры (апошнім часам будаваліся толькі адна- і двухпакаёвыя)? Так, магчыма, у наступным доме, які намерваюцца будаваць, калі будзе попыт, з’явяцца і кватэры большай плошчы, з трох пакояў.

Такія дыялогі з моладдзю, з маладымі сем’ямі, маладымі бацькамі карысныя і насамрэч патрэбныя, прычым для абодвух бакоў, напрыканцы сустрэчы заўважыў Аляксей Жураўлёў. Гэта магчымасць для жыхароў раёна напрамую задаць пытанне ўладзе, выказаць свае прапановы і ідэі, а для ўлады — магчымасць даведацца, чым жывуць людзі, што іх хвалюе, што займае іх думкі. Падзякаваўшы за змястоўную і прыемную сустрэчу, Аляксей Анатольевіч дадаў, што ён заўсёды адкрыты для дыялогу.

А. ВАСІЛЕЎСКАЯ

Фота Г. АЎТУХОВАЙ