“Усе фарбы жыцця — для цябе!” — так называлася выстава, арганізаваная па ініцыятыве Глускага раённага камітэта БРСМ у Дзень інвалідаў. Яна сустракала ўсіх, каго 3 снежня запрасілі ў раённы Дом культуры, там для дзяцей з інваліднасцю было наладжана цікавае музычна-казачнае прадстаўленне. На пачатку сустрэчы маленькіх гасцей і іх бацькоў прывітала намеснік старшыні Глускага райвыканкама Людміла Клыга. Заўсёды балюча, калі хварэе хтосьці з блізкіх, і балюча ўдвая, калі гэта дзіця. У нашым раёне ў сем’ях пражываюць 45 дзяцей з інваліднасцю, і Людміла Аляксандраўна, звяртаючыся да іх бацькоў, выказала словы захаплення іх чалавечай мужнасцю, уменнем не адступаць перад цяжкасцямі і шчыра пажадала, каб ім і далей па жыцці хапала сіл і цярпення. А дзеці заўсёды застаюцца дзецьмі, яны любяць радавацца і ўмеюць бачыць радасць у, здавалася б, звычайных праявах жыцця, тым больш, калі гучыць добрая песня, калі на сцэне разгортваецца сапраўдны казачны сюжэт. Вось і ў гэты дзень яны смяяліся з няўдалага Ваўка, апладзіравалі вясёламу гному Васю, радаваліся, што прыгоды ўсіх герояў скончыліся добра. Дадатковай прычынай для радасці сталі салодкія падарункі ад Фонду міру, якія атрымалі ўсе маленькія госці канцэрта.

Так, дзеці большыя аптымісты, чым мы, дарослыя, часта яны ж бываюць і больш цярплівымі, чым мы. Пра гэта падумалася, калі разглядала выставу работ дзіцячых гурткоў Хваставіцкага цэнтра культуры і раённага Дома культуры, аддзялення дзённага знаходжання інвалідаў і Веснаўскага дома-інтэрната. Чаго там толькі не было: папяровыя кветкі і адмысловыя вазы, млын, царква і карабель, шматлікія карцінкі і разнастайныя фігуркі, мяккія цацкі і вязаныя боцікі, а для штодзённых гаспадарчых патрэб — ладна змайстраваныя табурэткі і стул. Глядзіш на ўсё гэта багацце фарбаў і фантазіі і разумееш, што абмежаваныя фізічныя магчымасці — гэта толькі фармуліроўка з дыягназу, а насамрэч любы чалавек можа вельмі многае, галоўнае — мець вялікае жаданне і каб побач былі правільныя людзі. Як у гэтых дзяцей.

Т. ЛУГАВАЯ

Фота С. РУДЗІНСКАГА