Каб адчуць сваю прыналежнасць да гісторыі
Падарожжы, экскурсіі, паходы па мясцінах, звязаных з падзеямі Вялікай Айчыннай вайны, аказваюць вялікае выхаваўчае ўздзеянне на падрастаючае пакаленне. Брацкія магілы, абеліскі, помнікі невядомаму салдату, мемарыяльныя комплексы — усё гэта маўклівыя сведкі бяспрыкладнага гераізму беларускага народа, яго самаахвярнасці, нечалавечых пакут дарослых і дзяцей у гады самай страшэннай і самай знішчальнай вайны, якую толькі ведала чалавецтва.
Падрастаючае пакаленне па-вінна адчуваць прыналежнасць да гістарычнага мінулага Радзімы. Экскурсійныя паездкі, здзейсненыя настаўнікамі і вучнямі сярэдняй школы № 2 напярэдадні святкавання 70-годдзя вызвалення Беларусі ад нямецка-фашысцкіх захопнікаў, змаглі зрабіць для навучэнцаў трагічныя старонкі гісторыі Беларусі блізкімі і рэальнымі.
Мемарыяльныя комплексы “Азарычы”, “Чырвоны бераг”, пабудаваныя на месцы масавай гібелі дзяцей і дарослых у канцлагерах, уразілі школьнікаў і наблізілі да тых жудасных падзей. Наведванне Хатыні і аповед экскурсавода пра лёс спаленых вёсак Беларусі не пакінулі раўнадушнымі старшакласнікаў, якія праявілі цікавасць і да гісторыі “вогненных вёсак” Глушчыны. Больш аптымістычнай была экскурсія ў гістарычна-культурны комплекс “Лінія Сталіна”, дзе пад адкрытым небам адноўлены і абарудаваны ўчастак знакамітай Лініі Сталіна, якую пачалі будаваць яшчэ задоўга да вайны ў 1928 годзе.
У кожнай установе адукацыі краіны з нагоды святкавання 70-годдзя вызваленння Беларусі складзены свой уласны план мерапрыемстваў. У нашай школе наступнымі этапамі такога плана стануць школьны турыстычны злёт, прысвечаны гадавіне вызвалення, і паходы старшакласнікаў па месцах баявой славы Глускага раёна.
Святлана ЛІСІЦА, дырэктар СШ № 2