Многія з нас добра памятаюць камедыю Гайдая, дзе першым на трывожны свіст вартаўніка павінен быў з’явіцца дружыннік з чырвонай павязкай на рукаве і спыніць злачынныя дзеянні “праклятых расхіціцеляў сацыялістычнай уласнасці”. Праўда, там і “расхіціцелі” былі несапраўдныя (усё ўжо было ўкрадзена да іх), і дружыннік ліпавы — так, для прыкрыцця. На самой жа справе дружыны, добраахвотныя фарміраванні грамадзян, закліканы садзейнічаць праваахоўным органам у ахове грамадскага парадку. Пра гэта мясцовым дружыннікам нагадаў перад чарговым дзяжурствам старшыня савета грамадскага пункта аховы правапарадку Глуска Сяргей Слічонак, інструктаж правёў начальнік аддзялення правапарадку і прафілактыкі Глускага райаддзела ўнутраных спраў Генадзь Буклей, а з аператыўнай абстаноўкай пазнаёміў старшы аператыўны дзяжурны РАУС Валерый Дзяшчэня.
Усяго на прадпрыемствах і ў арганізацыях Глуска створаны і дзейнічаюць 11 добраахвотных дружын, якія аб’ядноўваюць больш за 130 чалавек. На гэты раз на дзяжурства заступалі дружыннікі з “Жылкамгаса”, Глускага лясгаса і “Рамбуда”. На адпрацоўку тэрыторый сельсаветаў і гарадскога пасёлка Глуск былі накіраваны сем мабільных груп з ліку супрацоўнікаў міліцыі і дружыннікаў.
Як паведамілі рэдакцыі ў Глускім РАУС, па выніках праведзенага на мінулым тыдні сумеснага дзяжурства міліцыі і добраахвотных дружын было складзена чатыры пратаколы за з’яўленне ў грамадскім месцы ў п’яным выглядзе і распіцце спіртнога ў грамадскім месцы, яшчэ адзін адміністрацыйны пратакол складзены за парушэнне правілаў дарожнага руху ў стане алкагольнага ап’янення. Акрамя таго, у ходзе рэйду на мехдвор, што ў вёсцы Бабірова, быў выяўлены факт крадзяжу 40 літраў дызельнага паліва.
Т. ЛУКАШЭВІЧ
Фота аўтара