Шмат эмоцый і ўражанняў прывезлі глушчане з купальскага свята ў Александрыі. Але не толькі іх — большасць удзельнікаў афіцыйнай делэгацыі, якую ўзначальваў старшыня раённага выканаўчага камітэта Юрый Дымша, вярнулася дадому з дыпломамі пераможцаў рэспубліканскага спаборніцтва сярод жывёлаводаў. У спісе лепшых галоўных заатэхнікаў краіны — намеснік па жывёлагадоўлі СВК “Калгас “Слаўгарадскі” Людміла Казюка; галоўных ветэрынарных урачоў — галоўны ветурач СВК “Калгас “Зара” Святлана Масько; брыгадзіраў малочна-таварных фермаў — брыгадзір МТФ Бабірова эксперыментальнай базы “Глуск” Міхаіл Стральчэня; аператараў па штучным асемяненні жывёлы — тэхнік-асемянатар СВК “Калгас “Зара камуны” Таццяна Сталько. Сярод аператараў машыннага даення кароў на рэспубліканскім узроўні адзначана Галіна Куксік са “Слаўгарадскага”, аператараў па абслугоўванні дойнага статка — скотнік-пастух з эксбазы “Глуск” Дзяніс Аднамах; па вырошчванні буйной рагатай жывёлы — Святлана Міхалькевіч з “Зары” і Ігар Парыч з эксбазы; па абслугоўванні свінаматак з парасятамі — Таццяна Міраненка з саўгаса “Завалочыцы”; па адкорме свіней — Віктар Тотараў з РАПТЗа. Дыпломы і грашовыя прэміі ўручыў міністр сельскай гаспадаркі і харчавання Леанід Заяц.

Прагучалі на свяце і прозвішчы глускіх фермераў, чые гаспадаркі ўвайшлі ў лік пераможцаў абласных спаборніцтваў. Па вытворчасці гародніны адкрытага грунту 1-е месца сярод спецыялізаваных сельскагаспадарчых арганізацый прысуджана сялянскай фермерскай гаспадарцы Івана Сокала “Даколь-агра”, а сярод сялянскіх (фермерскіх) гаспадарак, што спецыялізуюцца на вытворчасці прадукцыі раслінаводства, пераможцам прызнана фермерская гаспадарка Васіля Барысевіча. Дыпломы Магілёўскага абласнога выканаўчага ка-мітэта і грашовыя прэміі фермерам уручыў старшыня аблвыканкама Пётр Руднік.

Сярод сяброў, што сабрала Александрыя, былі і работнікі сферы культуры раёна, але, як і заўсёды ў святы, яны забяспечвалі адпачываючым добры настрой. Глушчане разам са шклаўчанамі, хоцімцамі і краснапольцамі прадстаўлялі народную творчасць Магілёўшчыны ў “Гасцёўні Бульбаша”, усё, што тут праходзіла, датычылася, само сабою, бульбы. Так, работнікі Дакольскага і Дуброўскага сельскіх клубаў гатавалі і частавалі ўсіх дранікамі па-глуску, а да іх маласольнымі гурочкамі ды іншымі прысмакамі. Канешне, галоўнымі дзеючымі героямі сталі Купалінка, у вобразе якой выступала Алеся Гваздзярова, і Купаліш (Аляксандр Грабко). Яны разам з артыстамі народнага вакальнага ансамбля “Крынічанька” спявалі, танцавалі для шматлікіх гасцей свята, а яшчэ ўдзельнічалі ў розных конкурсах, прысвечаных, зноў жа, беларускай бульбе. Для кулінарнага, напрыклад, глушчане напяклі хрушчоў з бульбачкі, якой, як вядома, нідзе няма смачней за глускую, і частавалі журы і ўсіх жадаючых. Дарэчы, словы для прэзентацыі стравы напісала наша глуская паэтка Любоў Ляпко. У конкурсе на лепшы аб’ёмны тэатральны касцюм, які прадстаўляла Вікторыя Сініцына, глушчане заваявалі дыплом 1-й ступені. Свае вырабы на фестываль прывезлі майстры Заеліцкага Дома рамёстваў, а сям’я Аляксея і Соф’і Меснік паўдзельнічала ў вялікім конкурсе сямейнай творчасці “Жывіце ў радасці”, прычым даволі паспяхова: у намінацыі “дэкаратыўна-прыкладное мастацтва “Сям’я-рукатворніца” (пякарскае майстэрства “Гасцінны каравай”)” яны занялі 2-е месца. Падчас свята нашы землякі змаглі абмяняцца творчым вопытам з расіянамі і нават “засвяціліся” на тэлеэкране.

Пабывалі ў Александрыі і прадстаўнікі Веснаўскага дома-інтэрната, прычым вярнуліся дадому не толькі з добрымі ўражаннямі, а і з грашовым ураджаем. Яны вазілі на александрыйскі кірмаш свае вырабы са сталярнай, ганчарнай і іншых майстэрань  і прадалі каля 50 адзінак на агульную суму 8 мільёнаў 130 тысяч рублёў. Аб гэтым нам расказаў дырэктар інтэрната Вячаслаў Клімовіч, дадаўшы: “Думаю, што мае супрацоўнікі правялі час цікава, яны сустрэліся з даўнімі нашымі сябрамі, павучыліся ў іншых майстроў, вынеслі для сябе новыя ідэі”.

Адным словам, глушчане дастойна прадставілі сваю малую радзіму на высокім рэспубліканскім узроўні.

Аксана ВАСІЛЕЎСКАЯ