Столькі смакаты адразу ў адным месцы я не бачыла даўно: тут і духмяныя свежаспечаныя хлябы розных відаў, рэцэптаў і памераў, нарэзаныя і не, румяныя батоны, здобныя булкі з начынкай і без яе, прыгожыя торты, апетытныя пірожныя і рулеты з крэмам, кексы з разынкамі, смажанкі, піца з рознымі начынкамі, смажаныя ў алеі піражкі і беляшы — чаго тут толькі не было, на гэтай прэзентацыі-дэгустацыі прадукцыі ўчастка хлебапячэння Глускага райпо. Уласна кажучы, гэта была не проста выстава-дэгустацыя, а выязная нарада з удзелам прадстаўнікоў гандлёвых арганізацый прыватнай формы ўласнасці, што размешчаны як у раённым цэнтры, так і ў сельскай мясцовасці — у Заеліцы, Клетным, Бабірова. Праходзіла нарада пад старшынствам намесніка старшыні райвыканкама Алены Булатоўскай. Яна зазначыла, што за апошнія два-тры месяцы мясцовы хлебазавод значна пашырыў асартымент і якасць выпускаемай прадукцыі, толькі хлебабулачных вырабаў тут штодня выпускаецца 18 відаў і да 30 відаў кандытарскіх вырабаў. З улікам патрэб пакупнікоў наладжаны выпуск палавінак нарэзаных батона і хлеба “кірпічыкам”, якія раней выпускаліся толькі цэлымі. Разам з гэтым, як зазначыла Алена Булатоўская, калі глускі хлеб ёсць на паліцах усіх прыватных магазінаў, то мясцовыя кандытарскія вырабы бяруць на рэалізацыю не ўсе, а дарэмна, бо смакавыя якасці іх не горшыя, чым бабруйскай, слуцкай або магілёўскай выпечкі, а асартымент разнастайны і часта абнаўляецца. Дарэчы, калі пакупнік у магазі-не бачыць цэннік зялёнага колеру — гэта значыць, тавар вытворчасці мясцовых кулінараў, і для многіх глушчан ён небеспадстаўна асацыіруецца з натуральным прадуктам.

Пра новыя віды хлебабулачных і кандытарскіх вырабаў вытворчасці Глускага райпо, якія нядаўна з’явіліся на паліцах магазінаў, прадстаўнікам прыватнага гандлю расказалі начальнік вытворчасці Вольга Галінская і начальнік лабараторыі Інэса Зубкевіч. Да больш актыўнага супрацоўніцтва з раённым спажывецкім таварыствам запрасіла мясцовых прыватнікаў намеснік старшыні райпо на нарыхтоўках і прамысловасці Ганна Янушэўская, глускія кааператары гатовы разгледзець і вырашыць усе пытанні і спрэчныя моманты, якія ўзнікаюць адносна графікаў пастаўкі, асартыменту або якасці прадукцыі.

Як падкрэсліла Алена Булатоўская, у пакупніка павінен быць выбар, якую прадукцыю якога вытворцы набываць, але ў той разнастайнасці, што мы бачым сёння на паліцах магазінаў, у поў-ным аб’ёме патрэбна прадстаўляць вырабы мясцовых кулінараў. Будзе збыт вырабляемай імі прадукцыі — будзе працаваць прадпрыемства, расці вытворчасць, а значыць, будзе работа людзям. Думаецца, нікому не трэба тлумачыць, наколькі гэта актуальна для нашага раёна. Пры гэтым справа вытворцаў — зрабіць так, каб вырабляемая імі прадукцыя была канкурэнтаздольнай, прывабнай па якасці і цане, зручнай для набыцця, толькі пры гэтай умове пакупнік прагаласуе за яе рублём.

Што ж да майго ўласнага меркавання, то якраз такая прадукцыя была шырока прадстаўлена на прайшоўшай прэзентацыі: усе вырабы не толькі апетытна выглядалі, але і былі вельмі смачнымі. Там можна было дэгуставаць — я і дэгуставала.

Таццяна ЛУКАШЭВІЧ

Фота Сяргея РУДЗІНСКАГА