Ёсць асаблівы талент — талент мацярынства”. Сустрэча пад такой назвай прайшла 14 кастрычніка ў Глуску, у Цэнтры культуры і вольнага часу “Арыён”, прымеркавана яна была да Дня маці. У фае арганізавалі выставу творчых работ удзельніц сустрэчы, аформілі прыгожую восеньскую фотазону. А ў зале для ўрачыстасцей глускага загса запрошаныя мамы прымалі віншаванні са святам. Як слушна зазначыў старшыня Глускага райвыканкама Аляксей Жураўлёў, хоць гэта і восеньскае свята і на дварэ ўжо холадна, але калі побач з намі б’ецца сэрца маці, нам заўсёды будзе цёпла. Галоўная місія жанчыны — у нараджэнні і выхаванні дзяцей, але многія нашы сучасніцы спраўляюцца не толькі з гэтай няпростай задачай, але і шмат робяць для сваёй краіны, свайго раёна, знаходзяць час для творчасці.

І ўдзельніцы гэтай сустрэчы — якраз такія актыўныя і творчыя. Кіраўнік раёна павіншаваў іх з Днём маці, пажадаў, каб агонь любові доўга гарэў у іх сэрцах і саграваў цяплом усіх, хто навокал, каб іх любілі дзеці і радавалі сваімі поспехамі.

Дзень маці сапраўды асаблівае свята, і нездарма яно супадае з днём Пакрова Прасвятой Багародзіцы. Не супасці яны і не маглі, адзначыў благачынны Глускай акругі протаіерэй Міхаіл, як здаўна нашы продкі дзякавалі Божай Маці за Яе заступніцтва і дапамогу, так і мы ўдзячны нашым маці і ўсім жанчынам за ўсё, што яны робяць для сваіх дзяцей і блізкіх, за клопат і ўвагу, перажыванні і слёзы, ціхмянасць і малітвы, любоў і пяшчоту. Удзельніц сустрэчы айцец Міхаіл павіншаваў з Пакровам Прасвятой Багародзіцы і Днём маці, пажадаў ім здароўя, даўгалецця і цярпення.

Мацярынства — вялікая місія жанчыны. Для нас прывычна, што мама захоўвае і падтрымлівае сямейны ачаг, клапоціцца пра дзяцей і блізкіх, робіць утульным дом. Але на ўрачыстай сустрэчы былі такія жанчыны-мамы, якія навучыліся добра сумяшчаць і місію захавальніцы ачага, і ролю выдатных спецыялістаў у сваёй справе, паспяховых кіраўнікоў, творчых асоб.

Для Вікторыі Корбут (яна працуе эканамістам у Цэнтры па забеспячэнні дзейнасці бюджэтных арганізацый) гэты дзень сапраўды асаблівы: 14 кастрычніка  яна стала маці, сяголета яе старэйшай дачцэ споўнілася 18 гадоў, Вікторыя шчаслівая мнагадзетная маці (у сям’і тры дачкі) і пры гэтым знаходзіць час для творчасці, займаецца маляваннем, піша цудоўныя карціны. 

У Дзіны Кульбіцкай таксама трое дзетак, дачка і два сыны, яна працуе ў цэнтральнай раённай бібліятэцы, сочыць за правільным харчаваннем, любіць спорт і вельмі рада, што цікавасць да спорту здолела прывіць і сваім дзецям.

Творчасць — адно з захапленняў Кацярыны Кісялёвай, ужо некалькі год яна наведвае заняткі па маляванні, а яшчэ вельмі любіць вандраваць, з сям’ёй наведала многія гістарычныя месцы Беларусі, пабывала ва ўсіх раёнах краіны і мае “Пашпарт вандроўніка”. Працуе Кацярына кантралёрам у раёне электрасетак, выхоўвае сына і дачку.

Тамара Толсцік — сапраўдны прыклад актыўнага чалавека, будучы на заслужаным адпачынку, яна ўзначальвае раённую ветэранскую арганізацыю, узімку вяжа прыгожыя шалі, а летам займаецца кветкамі, толькі руж у яе двары расце 157 кустоў. 

Галіна Сокал — на рабоце, у раённай бальніцы, галоўны бухгалтар, а дома абавязкова знаходзіць час для любімага занятку: яна вышывае крыжыкам, гэтаму яе хобі гадоў 15, а колькі карцін ужо вышыла за гэты час, і не палічыць, удзельнічае ў выставах.

У Таццяны Крамянецкай трое дзяцей, а нядаўна старэйшы сын ажаніўся, і сям’я пабольшала.

Як прызналася жанчына, яна заўсёды марыла, каб яе любімы занятак стаў яе работай, так і выйшла: яна аформіла самазанятасць і шые, аздабляе вышыўкай адзенне для свяшчэннікаў і храмаў, піша іконы. Усё гэта з лёгкай рукі айца Міхаіла і пры падтрымцы сям’і.

У Наталлі Балінай работа творчая, яна педагог Цэнтра творчасці, у творчай атмасферы растуць і яе сыны-двайняты, удзельнічаюць у розных конкурсах і спаборніцтвах. Наталля павіншавала ўсіх жанчын са святам і прачытала прыгожыя вершы пра сям’ю.

Што такое вялікая і дружная сям’я, Таццяна Пракопчык ведае не па чутках: у яе бацькоў было 10 дзяцей. У яе самой двое, старэйшая дачка ўжо атрымала прафесію і працуе, яна медык, а з бацькамі застаецца малодшы сын-чацвёртакласнік. Хоць сям’я і невялікая, але ў мамы клопатаў хапае і дома, і на рабоце, яна працуе бухгалтарам у эксбазе “Глуск”.

На сельскагаспадарчым прадпрыемстве працуе і Дар’я Лузан, яна бухгалтар у “Зары Камуны”. Некалькі год назад яе сям’я ўдзельнічала ў конкурсе “Уладар сяла”, ды так удала, што недзе праз год у іх нарадзілася другое дзіцятка, дачушка (першы — сын). Мама зараз знаходзіцца ў адпачынку, гадуе малую і любіць балаваць дамашніх сваім печывам. Сям’я звычайная, і клопаты звычайныя, як ува ўсіх, кажа пра сябе маладая жанчына.

У Ірыны Пятровай пасада такая, што забірае шмат часу і сіл, Ірына Георгіеўна ўзначальвае раённую бальніцу, і вельмі добра, што блізкія адносяцца да гэтага з разуменнем, яна ўдзячна мужу і сыну (ён ужо дарослы і таксама працуе ўрачом) за іх падтрымку.

А адпачыць, пераключыцца ад клопатаў кіраўніка ёй дапамагаюць звычайныя дамашнія клопаты ў сваім двары, на сваім участку.

Кацярыну Петрусь шмат хто ў раёне ведае як начальніка па рабоце з плацельшчыкамі па Глускім раёне Міністэрства па падатках і зборах, а ў жыцці яна жонка і мама дзвюх дачок, старэйшай 20, і яна прафесійны фатограф, малодшай 13 гадоў, яна школьніца. Вольны час мама аддае сям’і і звычайным жаночым клопатам.

Кіраўнічая пасада і ў Вольгі Караньковай, яна працуе  начальнікам глускага цэнтра банкаўскіх паслуг Белаграпрамбанка, а яшчэ яна мама двух дарослых сыноў і бабуля чатырох унукаў, ім яна і прысвячае свой вольны час, а яшчэ — любіць займацца раслінамі, прыемна назіраць, як з маленькай семачкі вырастае прыгожая кветка.

Двое дзяцей і ў начальніка глускага цэнтра банкаўскіх паслуг Беларусбанка Аксаны Асадчай. Дачка ўжо студэнтка, у свой час скончыла нашу школу мастацтваў па класе харэаграфіі, не пакінула гэта захапленне і ва ўніверсітэце, а сын-дзесяцікласнік любіць спорт, займаецца футболам. Бацькі выхоўваюць дзяцей сваім прыкладам, стараюцца, каб яны раслі ў атмасферы ўзаемаразумення, узаемападтрымкі і любові, гэта вельмі важна, гэта мацуе сям’ю.

Сем “я” ў сям’і глушчанкі Святланы Кісель, яны з мужам выхоўваюць пяць дзетак, двух сыноў і трох дачушак. Старэйшы вучыцца ў каледжы, а меншыя з бацькамі дома. У дзяцей свае захапленні і заняткі, муж любіць рыбачыць, а мама — пячы пірагі. Сям’я звычайная, кажа Святлана. Але нядаўна ў яе жыцці адбылася падзея, якую звычайнай не назавеш: мнагадзетная мама ўзнагароджана ордэнам Маці. Высокую дзяржаўную ўзнагароду на прайшоўшай урачыстасці Святлане Кісель пад апладысменты прысутных уручыў старшыня райвыканкама Аляксей Жураўлёў, павіншаваў, сказаў добрыя словы.

Добрай, цёплай, шчырай, кранальнай была і ўся гэта сустрэча. Для яе ўдзельніц выступалі выхаванцы школы мастацтваў і работнікі культуры, патрэбныя словы для кожнай запрошанай мамы знайшла вядучая імпрэзы, а нефармальным зносінам і нават дамашняй атмасферы спрыялі столікі, накрытыя белымі абрусамі, і духмяны чай з салодкімі пачастункамі. З цёплымі ўсмешкамі, кветкамі і тортамі жанчыны-мамы разыходзіліся з урачыстасці і неслі гэтую цеплыню і пяшчоту сваім дамашнім.

У Магілёве 14 кастрычніка таксама адбыўся святочны прыём: жанчын-маці, прадстаўніц розных сфер дзейнасці з усяго Прыдняпроўскага краю, ушаноўвалі ў Музеі Славы Магілёўшчыны. У ліку запрошаных былі і глушчанкі — педагог дзіцячай школы мастацтваў Надзея Баярка і выхавацель дзіцячага сацыяльнага пансіяната “Веснава” Святлана Анцюшэня.

Таццяна ЛУКАШЭВІЧ

Фота Ганны АЎТУХОВАЙ і mogilevnews.by